ДУШАНБЕ, 15 май — Sputnik. Омодагӣ ба мулоқоти сарони кишварҳои Осиёи Марказӣ аз масоии меҳварии суҳбати раисҷумҳури Тоҷикистон, Эмомалӣ Раҳмон бо пешвои миллати Туркманистон, Қурбонгулӣ Бердимуҳаммадов будааст.
Ба иттилои дафтари матбуоти раисҷумҳури Тоҷикистон, суҳбати телефонии Эмомалӣ Раҳмон бо раиси Халқ Маслахати Туркманистон Қурбонгулӣ Бердимухамадов 15 май сурат гирифт.
"Дар рафти суҳбат тамоми маҷмуи масъалаҳои ҳамкории дуҷониба, натиҷаҳои сафари давлатии Президенти Туркманистон ба Тоҷикистон, вазъи имрӯзаи минтақавӣ ва ҷаҳонӣ мавриди баррасӣ қарор дода шуд", - омадааст дар иттилоия.
Ҳамчунин ҷонибҳо зимни суҳбати телефонӣ масъалаҳои омодагӣ ба чорабиниҳои сатҳи олии минтақавӣ, аз ҷумла саммитҳои Вохӯрии машваратии сарони давлатҳои Осиёи Марказӣ ва Бунёди байналмилалии наҷоти Аралро баррасӣ кардаанд.
Дафтари матбуоти раисҷумҳури Тоҷикистон таъкид намуд, ки мулоқоти мазкур моҳи сентябри соли ҷорӣ дар шаҳри Душанбе дар назар аст.
Баргузории мулоқоти машваратии сарони кишварҳои Осиёи Марказӣ тайи солҳои охир ба ҳукми анъана даромада, он ҳар сол ба навбат дар яке аз кишварҳои минтақа баргузор мешавад. Соли гузашта мизбони мулоқоти машваратии президентҳои Осиёи Марказӣ Қирғизистон ва аз он пештар Туркманистон буд.