ДУШАНБЕ, 22 фев – Sputnik. Ҷаҳон ҳеч гоҳ ба ин ҳад наздик ба муноқишаи ҷаҳонӣ набудааст, изҳор дошт президенти собиқи ИМА Доналд Трамп зимни ироаи як паёми видеоӣ.
Трамп дар муроҷиати видеоияш "ташкилоти фасодзадаи Вашингтон" таҳти сарварии раиси кунунии Кохи Сафед Ҷо Байденро дар сар задани ин вазъият гунаҳкор кард.
"Дар Амрико мо бояд аз намояндагони сохторҳои фасодзада, ки ҳар як тасмими муҳими сиёсати хориҷиро вайрон кардаанд, халос шавем", - таъкид кард президенти собиқ.
Вай қайд кард, ки ҳатто "чеҳраҳои худӣ" дар бораи Байден мегӯянд, ки ӯ дар заминаи дигар кишварҳо ва ҷангҳо як тасмими хубе қабул накардааст.
Трамп инчунин гуфт, ки ҳангоми президент буданаш ҳама гуна "маслиҳати фалокатовар"-и генералҳо, бюрократҳо ва "ба истилоҳ дипломатҳо"-и Вашингтонро рад кардааст.
Вай афзуд, ин одамон танҳо медонанд, ки чӣ тавр Амрикоро ба даргириҳо ҷалб кунанд, аммо касе намегӯяд, ки чӣ гуна аз он берун равад.
Ба унвони мисол, ӯ муовини вазири хориҷаи Амрико Виктория Нуланд ва бисёриҳое мислашро зикр намуд, ки "бо тела додани Украина ба сӯи НАТО машғуланд". Маҳз онҳо муддати тӯлонӣ дар ҷустуҷӯи муқовимат буданд.
"Ва ҳоло мо дар остонаи ҷанги сеюми ҷаҳонӣ қарор дорем", - гуфт ӯ ва бори дигар таъкид кард, ки муноқишаи ҷаҳонӣ ҳеҷ гоҳ ин қадар наздик набуд.