ДУШАНБЕ, 21 ноя — Sputnik. Толибҳо Абдулҳамиди Хуросонӣ, яке аз қумондонҳои тоҷиктаборашон дар вилояти Панҷшерро халъи силоҳ карданд, хабар дод Sputnik Афғонистон бо такя ба рӯзноманигор Башир Аҳмад Косонӣ.
Ба иттилои манбаъ, тамоми аслиҳаву амволи Хуросонӣ, ки дар маҳаллаи Хайрхонаи Кобул буд, мусодира шудааст.
Тахмин меравад, ки ин як вокуниш ба шикоятҳои Хуросонӣ ба расонаҳои мухолиф дар бораи раҳбарони толибҳо мебошад.
Вай ахиран дар "Twitter" навишт, ки аз хидмат дар сафи ин гуруҳ худдорӣ мекунад, зеро дар он ҷо паштунҳои ҳилмандӣ ва қандаҳорӣ ҳукмронӣ мекунанд, бахусус вазири дифоъ, Муҳаммад Яъқубро зикр намудаст, ки аз рӯи меъёрҳои қавмӣ афроде мисли Хуросониро таҳқир мекунад.
Маврид ба зикр аст, ки фармондеҳи пешини амниятии вилояти Панҷшер моҳи октябри соли равон низ изҳор дошта буд, ки фармондеҳи сипоҳи марказии толибҳо аз ӯ хост таҷҳизоту афродашро таслим кунад.
Хуросонӣ гуфта буд, ки аз ӯ хоста шудаст, дар пайи таслими афроду силоҳ худаш дар бахши сипоҳи марказӣ аскарӣ кунад
Дар зимн таъкид намуд, ки ӯ аз ихтори ҳеч кас наметарсад ва аз фармондиҳи сипоҳи марказии толибон ҳам наметарсад ва монанди Амруллоҳи Солеҳ, ғуломбача намебошад ва касе ба ӯ ихтор дода наметавонад.
Ӯ ишора ба раҳбарони гурӯҳи толибон мегуяд, ки бояд раҳбарони Аморати Исломӣ инро дунбол кунанд ва ин ҳукуматро бояд қавмӣ накунанд.