ДУШАНБЕ, 16 май — Sputnik. Владимир Путин, раисҷумҳури Русия зимни дидор бо Эмомалӣ Раҳмон, роҳбари Тоҷикистон таъкид кард, ки вазъи минтақа ҳассос аст.
Ҳамзамон раисҷумҳури Русия гуфт, назари Эмомалӣ Раҳмон дар масъалаи таҳкими амнияти минтақа барояш муҳим мебошад.
“Албатта, мо бо Шумо баназдикӣ дар суҳбати телефонӣ вазъи минтақаро баррасӣ карда будем. Вазъи минтақа мушкил боқӣ мемонад ва барои ман муҳим аст, назари шуморо дар ин бора шунавам, то амниятро дар ин самт дар ояндаи наздик боз ҳам таҳким бахшем”, - гуфт Путин.
Ёдовар мешавем, раисҷумҳури Тоҷикистонро дар сафари корӣ ба пойтахти Русия вазири корҳои хориҷии кишвар ва дигар шахсони расмӣ ҳамроҳӣ мекунанд.
Эмомалӣ Раҳмон, раисҷумҳури Тоҷикистон барои ширкат дар нишасти сарони кишварҳои узви Созмони Паймони Амнияти Дастаҷамъӣ (СПАД), ки 16 май дар Маскав баргузор мешавад, вориди пойтахти Русия шуд.
Раисҷумҳури Тоҷикистон бо даъвати Владимир Путин, раисҷумҳури Русия ва раиси Шӯрои амнияти дастаҷамъии СПАД, нахуствазири Арманистон Никол Пашинян барои ширкат дар ҳамоиши солонаи СПАД, ки ба муносибати 30-юмин солгарди имзои Шартномаи амнияти дастаҷамъӣ ва 20-умин солгарди таъсиси СПАД баргузор мешавад, вориди Маскав шуд.