ДУШАНБЕ, 31 мар — Sputnik. Талант Мамитов, раиси парлумони Қирғизистон аз мақомоти Русия даъват кардааст, ки дар соли равон як бори дигар "афви муҳоҷирон"-и қирғизистониро эълом кунад.
Вай ин пешниҳодашро ахиран дар мулоқот бо раиси Шӯрои Федератсияи Русия Валентина Матвиенко, ки дар шаҳри Алматои Қазоқистон сурат гирифт, баён доштааст.
Оқои Мамитов ҳамчунин аз ҷониби Русия даъват кард, ки талабот нисбати ба муҳоҷирони қирғизистониро камтар кунад.
Бояд гуфт, дар Русия тақрибан то 1 миллион шаҳрванди Қирғизистон кору зиндагӣ мекунанд. Ба иттилои мақомоти Қирғизистон, дар соли 2021 муҳоҷирони ин кишвар ба Қирғизистон наздик ба 2,7 млрд доллар интиқол додаанд.
Гуфта мешавад, ки Русия дар ҳоли ҳозир 76 ҳазор қирғизистониро ба рӯйхати сиёҳ ворид ва вуруди онҳоро ба ин кишвар манъ кардааст.