ДУШАНБЕ, 28 фев — Sputnik. Меъёри бозтамвил дар ҷаласаи изтирории Бонки марказии Русия дар ҳаҷми 20% муқаррар шуд, ки баландтарин нишондоди бесобиқа арзёбӣ мегардад.
Бонки марказӣ бо нашри як иттилоия гуфт, шароити берунӣ барои иқтисоди Русия комилан тағйир ёфтааст. Таъкид шудааст, ки болоравии меъёри бозтамвил барои коҳиши таъсироти манфӣ мусоидат мекунад.
"Афзоиши меъёри бозтамвил нишондоди пасандозгузориро то ҳадде боло мебарад, ки ин барои ҷуброни хатарҳои таварруми афзоянда кифоят мекунад. Ин имкон медиҳад, ки эътидоли молиявию нарх таъмин шавад", - омадааст дар иттилоия.
Ниҳоди танзимкунандаи бахши молиявии Русия ҳамчунин таъкид намудааст, ки афзоиши меъёри бозтамвил барои ҳифзи пасандози шаҳрвандон аз беқурбшавӣ хидмат мекунад.
Масъулин муътақиданд, ки чунин сиёсати пулию молӣ имкон медиҳад, ки қурби пули миллӣ таҳким бахшида шавад ва ҳамчунин фоизи қарзу пасандозҳоро боло мебарад.
Таъкид гардидааст, ки Бонки марказии Русия вобаста ба вазъият иқдоми минбаъдаро амалӣ хоҳад кард.
Меъёри бозтамвил нишондоди ҳадди ақали фоизҳо мебошад, ки аз рӯи он Бонки марказӣ ба бонкҳои тиҷоратӣ қарз медиҳад ва ҳамчунин пасандоз қабул мекунад. Ҳаҷми меъёри бозтамвил ба сатҳи таваррум таъсир дорад.
Маврид ба зикр аст, дар пайи амалиёти низомии Русия дар Украина ҷомеаи ҷаҳонӣ, аз ҷумла Ғарб таҳримотеро роҳандозӣ кард, ки низоми бонкиро низ фаро гирифт. Аз ҷумла бархе бонкҳои Русия аз низоми байналмилалии интиқоли пул хориҷ карда шудаанду қисме аз дороиҳои Бонки марказии Русия аз ҷониби кишварҳои аврупоӣ баста шуданд.