ДУШАНБЕ, 26 янв — Sputnik. Бошгоҳи футболи "Хуҷанд" сафи худро пур мекунад. Танҳо дар як рӯз ду легионер ба ин тим омад.
Навсозиҳо дар ҳайати даста бо омодагии он ба Ҷоми AFC-2022 рабт дода мешавад, гуфт ба Sputnik Тоҷикистон директори бошгоҳи футболи "Хуҷанд" Мурод Умаров.
"Барои ин мо ба даста бозигарони навро ҷалб мекунем. Равзанаи интиқол боз аст ва мо аллакай 80% нақшаи ҷалби бозигарони навро иҷро кардем", - гуфт раиси бошгоҳ.
Ӯ ҳамчунин маслиҳат дод, ки навгониҳои дастаро пайгирӣ кунед, зеро ин хабари охирин дар бораи чеҳраҳои нав дар "Хуҷанд" нест.
"Дар назар аст, панҷ бозигари нав ҷалб шаванд, ки як нафар аз хориҷи кишвар ва чаҳор нафари дигар аз дохили кишвар мебошанд", - гуфт Мурод Умаров.
Ёдовар мешавем, 25 январ бошгоҳи футбол дар бораи пурра шудани ҳайат бо ду бозигар хабар дода буд.
Ду бозигар аз Белорусия ба даста дохил шуданд: Андрей Левковетс ва Игнатиус Сидор.
Нимҳимоятгар Андрей Левковетс дастпарвари тими "Шахтёр Солигорск" буда, аз соли 2014 дар чемпионатҳои Беларус баромад мекунад.
Игнати Сидори 23-солаи белорус қаблан дар ҳайати "Крумкачи"-и Минск бозӣ ва дар Лигаи якум ширкат мекард. Сидор дастпарвари "Торпедо Жодино" буда, аз соли 2016 дар чемпионати Беларус бозӣ мекунад.
Шартнома бо ҳар ду футболбоз то 31 декабри соли 2022 ба имзо расидааст. Андрей Левковетс дар "Хуҷанд" бо рақами 7 ва Игнати Сидор бо рақами 98 бозӣ мекунад.