ДУШАНБЕ, 14 янв — Sputnik. Вазири умури хориҷии Русия мегӯяд, созиш дар мавриди пешниҳодҳо барои замонати амниятӣ аз ИМА вобаста аст.
Ӯ зимни нишасти матбуотӣ таъкид намуд, ки Маскав интизор дорад, Ғарб аз рӯи ҳар пешниҳоди ҷониби Русия посухи хаттӣ медиҳад. Вай афзуд, шарикони ғарбӣ дарк менамоянд, ки Русия абадан мунтазир намемонад ва бояд зарурати вокуниши фавриро фаҳмида бошанд.
Ба гуфтаи Лавров, тавофуқ дар ин масоил пеш аз ҳама ба ИМА вобастаасту изҳорот дар мавриди зарурати машваратҳо бо шарикон баҳонае беш нестанд.
Вазири умури хориҷии Русия таъкид намуд, ки агар Ғарб пешниҳодҳои Маскавро қабул накунад, вокуниш бо назардошти ҳамаи омилҳо сурат хоҳад гирифт.
"Ҳозир фолбинӣ кардан, ки агар ИМА ва НАТО пешниҳодҳоро рад кунанд, иқдоми Маскав чӣ хоҳад буд, созанда нест", - гуфт вазир.
Маврид ба зикр аст, ки ахиран миёни НАТО ва Русия дар шаҳри Брюссел гуфтушунидҳо баргузор гардиданд.
Қаблан Маскав лоиҳаи созишномаҳо бо ИМА ва кишварҳои узви НАТО-ро пешниҳод карда буд.
Дар ин тарҳҳо бандҳои марбути кафолати тарафайни амниятӣ дар Аврупо, ҷой надодани мушакҳои миёна ва кутоҳпарвоз дар фосилаи дастрасӣ ба қаламрави ҳамдигар, худдорӣ аз васеъ кардани эътилоф, аз ҷумла аз ҳисоби кишварҳои пасошӯравӣ матраҳ шудаанд.
Йенс Столтенберг, дабири кулли НАТО зимни шарҳи пешниҳодҳои Маскав дар мавриди густариш наёфтани ин эътилоф изҳор дошт, ки ҳар кишвар бояд ҳаққи мустақили интихоб дошта бошад, ки мехоҳад ба ин иттиҳоди низомӣ ворид шавад ва ё на.