ДУШАНБЕ, 24 ноя - Sputnik. Вазорати амри ба маъруф ва наҳй аз мункари толибон ба расонаҳо ҳушдор додааст, аз пахши сериалҳое, ки занон дар он иҷрои нақш карданд, худдорӣ кунанд, иттилоъ додааст Sputnik Афғонистон.
Вазорати амр ба маъруф ва наҳй аз мункари толибон таъкид кардааст, ки расонаҳои телевизионӣ набояд филм ва сериалҳоеро пахш кунанд, ки бар зидди усули шаръӣ ва арзишҳои Афғонистон бошанд.
Ҳамчунин ин ниҳоди ҳукумати толибон илова кардааст, ки пахши филмҳои дохилӣ ва хориҷие, ки дар он фарҳанг ва оини хориҷиҳо бозтоб меёбад ва сабаби бадахлоқӣ дар ҷомеа мешавад, манъ аст.
Вазорати амр ба маъруф ва наҳй аз мункари толибон ҳамчунин қайд кардааст, барномаҳои тафреҳии телевизионӣ набояд ба тарзе таҳия шавад, ки дар он ба касе таҳқир ва иҳонат шуда бошад.
Дар ҳамин ҳол пахши сериалҳое, ки дар он ба шиорҳои динӣ ва каромати инсонӣ иҳонат шуда бошад, мамнуъ аст.
Толибон пахши сериалҳоеро, ки дар он нақши паёмбарон ва асҳоби Пайғамбари ислом (с) тамсил шуда бошад, мутлақан ҳаром ва мамнуъ эълон кард.
Бар асоси ин дастури толибон, барандаҳои зан бояд ҳиҷоби исломиро риоят ва аз ҳузур дар барномаҳои танзӣ худдорӣ кунанд.