ДУШАНБЕ, 28 окт — Sputnik. Дар Афғонистон мавориди фурӯши кӯдакон афзоиш ёфтааст, хабар медиҳад "TOLONews".
Бинобар иттилои манбаъ, мардум аксари вақт роҳи дигари таъмини оилаҳои худро надоранд, ба ҷуз он ки фарзанди худро фурӯшанд.
Ҳоло нархи кӯдак ҳам тағйир ёфтааст. Агар як моҳ қабл дар Бодғис кӯдакро бар ивази 300 доллар мефурӯхтанд, ҳоло қимати он то 550-590 доллар зиёд шудаст, менависад манбаъ.
Аксари шаҳрвандони Афғонистон, ки пас аз сари қудрат омадани "Толибон"* бе хонаву дар мондаанд ва дар хаймаҳо ба сар мебаранд, ба зиндагии боз ҳам даҳшатоваре гирифтор шудаанд. Нодорӣ агар аз як тараф онҳоро домангир аст, аз ҷониби дигар сард шудани ҳаво сокинонро дар ҳолати ногувор қарор додааст.
Дар ҳамин ҳол масъулони Барномаи озуқавории ҷаҳонӣ дар Афғонистон ҳушдор медиҳанд, ки бо фарорасии зимистон ва мушкилоти кунунӣ авзоъ дар ин кишвар буҳронитар хоҳад шуд.
Ба гуфтаи онҳо, дар як моҳи ахир беш аз се миллиону нуҳсад ҳазор нафар бастаҳои ғизоӣ хайр кардаанд, аммо ин хайр барои беҳтар кардани вазъ кофӣ нест, зеро беш аз се миллион кӯдак аз норасоии ғизо ранҷ мебаранд.
Волидони онҳо чун имкони таъмини фарзандони худ бо ғизоро надоранд, маҷбур мешаванд, онҳоро фурӯшанд. Ба ин роҳ кӯдакони худро аз фақру гуруснагӣ наҷот медиҳанд.
Як зани афғонистонӣ ба "TOLONews" изҳор доштааст, ки моҳи қабл ҳамсараш даргузашт ва духтари 13-солаи маризе дорад, ки ҳатман бояд ба муолиҷа фаро гирифта шавад. Ӯ ба хотири тадовӣ намудани духтари бузургаш фарзанди 1,5-моҳаи худро мефурӯшад.
Ба мисли ин зан садҳо оилае дар Афғонистон мавҷуд аст, ки аз ночорӣ кӯдакони худро бар ивази маблағи ночизе мефурӯшанд.
*-созмони террористии мамнуъ дар Русия ва Тоҷикистон