ДУШАНБЕ, 26 окт — Sputnik. Бонки Аврупоии Таҷдид ва Рушд ҳамроҳ бо мақомоти Тоҷикистон сармоягузорӣ дар сохтмони нерӯгоҳи "Роғун"ро баррасӣ карданд, хабар медиҳад дафтари матбуотии Вазорати рушди иқтисод ва савдои кишвар.
Завқӣ Завқизода, вазири рушди иқтисод ва савдои Тоҷикистон бо мудири иҷроияи Бонки Аврупоии Таҷдид ва Рушд дар кишварҳои Осиёи Марказӣ Жужанна Харгитай мулоқот кард.
Ҷонибҳо ҳамчунин ба татбиқи лоиҳаҳои мавҷудаи давлатии сармоягузорӣ дар Тоҷикистон, ки аз ҷониби БАТР дастгирӣ мешаванд, дахл карданд.
Дар идомаи мулоқот намояндагони бонк омодагии худро барои таъсиси корхонаҳои муштарак дар минтақаҳои озоди иқтисодӣ ва бунёди марказҳои ҳамлу нақл изҳор карданд.
Масъалаҳои расонидани кумаки техникӣ барои татбиқи барномаи "иқтисоди сабз", аз ҷумла дастгирии бахши хусусӣ дар самти истеҳсоли нерӯи барқ аз манобеи барқароршавандаи энергия низ баррасӣ шуданд.
БАТР ҳамчунин омодагияшро барои таъсиси ҷойҳои нави корӣ, беҳбуди иқтидори зеҳнии корхонаҳои хусусӣ ва дигар соҳаҳо дар Тоҷикистон изҳор намудааст.
Қаблан БАТР барои беҳбуди устуворӣ ва самаранокии бахши энержӣ дар Тоҷикистон ба маблағи 35 миллион евро пул ҷудо карда буд.