ДУШАНБЕ, 13 окт – Sputnik. "Барқи тоҷик" сабабҳои қатъи ноогоҳонаи интиқоли қувваи барқро шарҳ дод, хабар медиҳад хадамоти матбуотии ин ниҳод.
Дар изҳороти "Барқи тоҷик" гуфта мешавад, ки интиқоли қувваи барқ дар бархе аз манотиқи кишвар ба хотири омодагӣ ба зимистон қатъ мешавад.
Манбаъ меафзояд, ки зимистон барои таъминоти барқ давраи фавқулодда аст ва вобаста ба афзудани талабот мушкилот низ зиёд мегардад.
"Дар давраи тайёрӣ ба зимистон ва омода намудани низоми энергетикии кишвар, инчунин гузаронидани корҳои профилактикӣ дар зеристгоҳҳои хурду калон, дигар таҷҳизоти интиқоли барқ дар баъзе қитъа ва ноҳияҳо дар соатҳои муаяйн имкон дорад, ки интиқоли барқ қатъ шавад", - омадааст дар хабар.
Хадамоти матбуотии "Барқи тоҷик" таъкид карда, ки ин тадбир зарурист ва ҳар сол дар ибтидои зимистон гузаронда мешавад.
"Аз ин рӯ аз муштариёни нерӯи барқ ва роҳбарони корхонаву муассисаҳо хоҳиш мекунем, ки дар давраи зимистон ҳар қадар имкон доранд, аз барқ сарфакорона истифода баранд", - гуфта мешавад дар изҳороти ширкат.
Ин дар ҳолест, ки сокинони кишвар аз қатъи интиқоли қувваи барқ шикоят мекунанд. Сокинони Суғд мегӯянд, аз соати 8:00 то 11:00 ва гоҳо аз 14:00 то 17:00 қувваи барқ хомӯш мешавад.