ДУШАНБЕ, 20 авг — Sputnik. Забеҳуллоҳ Муҷоҳид, сухангӯи Толибон* аз рафтори ноодилона Фейсбук нисбати саҳифаҳои корбарони мақомҳои баландпоя ва ҳомиёни ин гурӯҳ интиқод кард, иттилоъ додааст Sputnik Афғонистон дар истинод ба Interest.
Сухангӯи гурӯҳи Толибон* Фейсбукро ба саркуби озодии баён ва нақзи ҳуқуқи гурӯҳҳои исломгаро айбдор кард. Вай шикоят кард, ки ширкати Фейсбук дастрасии ин гурӯҳ ҳамчунон дар Instagram ва WhatsApp низ мамнӯъ кардааст.
Вай таъкид кард, ки Толибон* аз хидматрасонии ин ширкат маҳрум шудаанд, чунки ин гурӯҳ дар феҳристи таҳримҳои Амрико ҳамчун як созмони террористӣ қарор дорад.
Масъулони ширкати Фейсбук ахиран эълом доштанд, ки ин шабака фаъолият ва муҳтавои марбут ба гурӯҳи Толибонро шиносоӣ ва масдуд мекунанд.
Ба гуфтаи кормандони ширкат, барои ҳифзи минбаъдаи корбарон гурӯҳи алоҳидаи коршиносон оид ба Афғонистон таъсис дода шудааст. Онҳо дар шиносоии муҳтавои ғайриқонунӣ кӯмак хоҳанд кард.
* - созмони террористии мамнӯъ дар Тоҷикистон, Русия ва бархе кишварҳои дигар