ДУШАНБЕ, 11 июл - Sputnik. Роҳбари маркази омӯзиши сиёсати Афғонистон Андрей Серенко натиҷаҳои музокироти ҳайати "Толибон" -ро дар Маскав, дар шабакаи Телеграми худ таҳлил кард.
Коршинос баёноти калидии "Толибон" -ро таҳлил карда, тавзеҳ дод, ки чаро онҳо танҳо изҳорот боқӣ мемонанд.
"Толибон" бар зидди қочоқи маводи мухаддир мубориза мебаранд
Роҳбари маркази омӯзиши сиёсати Афғонистон қайд кард, ки айни замон даромад аз тиҷорати маводи мухаддир на камтар аз нисфи кулли буҷаи "Толибон" -ро ташкил медиҳад.
"Даст кашидан аз даромади маводи мухаддир маънои коҳиш додани буҷаро дорад. Ин кор имрӯз ва дар рӯзҳои воқеии ҷанг комилан ғайри қобили тасаввур аст", - бовар дорад сиёсатшинос.
"Толибон" дар Афғонистон бо "ДИИШ"* мубориза хоҳанд бурд
Серенко гуфт, ки мувофиқи афкори омма дар маҷмӯъ "дар Афғонистон ҷиҳодиёни хуб (Толибон) ва ҷиҳодиёни бад (ДИИШ) вуҷуд доранд". Аммо, дар асл, ба гуфти коршинос, ҳардуи ин гурӯҳҳо дар як платформаи технологӣ ва иттилоотӣ, ки шабакаи Ҳоққонӣ дар ихтиёр дорад, фаъолият мекунанд.
"Аъзоёни идеологии ДИИШ аз ҷониби нерӯҳои ҳукуматӣ ва "Толибон", ки манфиатҳои онҳо дар ин ҳолат ба ҳам рост омаданд, оромона нест карда шуданд. Ҳамон ДИИШ*, ки ҳар сари чанд вақт дар Кобул ҳамлаҳои пурсарусадои террористӣ анҷом медиҳад, лоиҳаи шабакаи Ҳоққонӣ аст, ки дар навбати худ як қисми Толибон* мебошад", - гуфт коршинос.
Серенко ба хулосае омад, ки ин ваъда низ афсонавӣ менамояд, зеро Толибон наметавонанд бо худ мубориза баранд.
"Толибон" амнияти марзҳои кишварҳои Осиёи Марказиро кафолат медиҳанд
Коршинос қайд кард, ки ба ин ваъдаи ҷангиён мешавад бовар кард, зеро чунин тавсеа барои худи Толибон судовар нест.
"Онҳо ба муваффақият дар мубориза барои қудрат дар Афғонистон манфиатдоранд", - гуфт сиёсатшинос.
Серенко инчунин афзуд, ки шахсони расмии дипломатии Толибон* ба гурӯҳҳои воқеии ҷангӣ таъсири кам доранд ва наметавонанд амалҳои онҳоро дар маҳал назорат кунанд.
Гузашта аз ин, дар байни дипломатҳо ва пешвоёни ҳарбӣ мухолифат вуҷуд дорад ва аксар вақт ҷангҳо ба гуфтушунид халал мерасонанд.
Ваъдаҳои роҳбари "шӯъбаи муносибат бо шаҳрвандони Афғонистон" дар Қатар, ки дар Маскав садо доданд, чандон арзишманд нестанд.
Ҳастанд ҷангиёне, ки дар масъалаҳое, ба монанди ҷиҳоди амалӣ дар Афғонистон ваъдаҳои воқеӣ медиҳанд, аммо онҳо сафарҳои хориҷӣ анҷом намедиҳанд, хулоса кард коршинос.
* созмони террористие, ки дар Русия ва Тоҷикистон манъ карда шудааст