ДУШАНБЕ, 5 июл — Sputnik. Имрӯз дар Додгоҳи вилоятии Маскав мурофиаи додгоҳии парвандаи куштори Ҳувайдо, духтараки 5-солаи тоҷик баргузор мешавад.
Дар ин бора падари Ҳувайдо, Абдусалом Саидов ба Sputnik Тоҷикистон хабар дод.
Ёдрас мешавем, пештар, 22 июн баррасии ин парванда бо далели ташдиди вазъи коронавирус дар Русия ба таъхир андохта шуда буд.
Ҳамин тавр, дар назар аст, имрӯз додгоҳ ду масъаларо баррасӣ кунад.
"Ин тамдиди ҳабси Александр Сёмин ва дубора ба тафтишот равон кардани парванда мебошад", - хабар дода буд пештар вакили Саидов, Шавкат Умаров.
Ба гуфтаи ӯ, дар ин бора пештар Суди вилоятии Маскав қарори марбута қабул карда буд.
"Суди вилоятии Маскав қарорашро қабул карда буд, лекин ҷониби ҳимояи боздоштшуда ба суди аппелятсионӣ шикоят карданд. Ҳамин шикоятро суди аппелиатсионӣ баррасӣ карда, як ду хатогии протсесуалӣ ёфт, ки начандон ҷиддӣ аст, аммо бо ҳамин асос қарор боз ба судяи нав баргардонида шуд, то онро аз сари нав дида, баррасӣ кунад", - таъкид мекунад ҳомии ҳуқуқ.
Ёдрас мешавем, соли 2018, моҳи июл куштори як духтараки 5-солаи тоҷик Ҳувайдо Тиллозода ҷомеаи Русия ва Тоҷикистонро такон дода буд. Ҳодиса дар шаҳри Серпухови вилояти Маскав рух дод.
Духтарак бо падар ва модараш дар яке аз биноҳои истиқоматии шаҳр ба сар мебурданд. Падари хонавода Абдусалом Саидов то замони ҳодиса кор мекард, модари Ҳувайдо Нигина Абдусаломова фарзандонашонро нигоҳубин мекард.
Ҳувайдо Тиллозода аз майдончаи бозие, ки дар назди хонаашон буд, нопадид шуд ва баъди як рӯзи ҷустуҷӯ ҷасадашро аз назди роҳи оҳани шаҳр пайдо карданд. Ҳарчанд аз қазияи гӯшношунид тақрибан 3 сол мегузарад, ҳукм содир нашудааст.