ДУШАНБЕ, 19 июн - Sputnik. Кумитаи миллии олимпии Тоҷикистон мегӯяд, Моҳру Ҳалимова, узви дастаи мунтахаби ҷумҳурӣ дар риштаи таеквондо дар Чемпионати Осиё сазовори медали биринҷӣ шуд.
Ба иттилои манбаъ, Чемпионати Осиё оид ба таеквондо 16-18 июн дар шаҳри Бейрути Лубнон бо иштироки 186 варзишгар аз 30 давлат баргузор шуд.
Федератсияи таеквондо ВТФ-и Тоҷикистон тавзеҳ додааст, ки Моҳру Ҳалимова дар вазни то 67 кило муҳорибаро аз даври чорякфинал оғоз карда, бар намояндаи Корея, Сонг Да Бин дастболо шуд. Сипас ӯ дар нимфинал аз варзишгари Урдун, Ҷулйана Содиқ шикаст хӯрд ва ҷои сеюмро гирифт.
Ин ниҳод афзуд, варзишгарони дигари ҷумҳурӣ - Шоҳрух Баротов (вазни -58кг), Муҳаммадҳасан Шоҳмаҳмадов (-80кг), Хуррам Меҳтаршоев (-74кг), Муниса Ойматова (-49кг) пас як пирӯзӣ дар чорякфинал, Муҳаммадҳусейн Шоҳмаҳмадов (-68кг) ва Муниса Исматова (-62кг) дар даври аввал аз ҳарифонашон мағлуб шуданд.
Зикр шудааст, ки ду довари дараҷаи байналмилалӣ аз Тоҷикистон - Давлатшо Мирзоев ва Вафоназар Алиназаров мусобиқотро дар ин чемпионат ҳакамӣ намуданд.
Ба иттилои Федератсияи таеквондо ВТФ-и Тоҷикистон, варзишгарони ҷумҳурӣ, ҳамчунин 19-21 июн дар мусобиқаи байналмилалӣ – “Beirut Open” ширкат мекунанд.