ДУШАНБЕ, 11 июн — Sputnik. Дар масири Душанбе - Кӯлоб - Хоруғ садамаи маргбори нақлиётӣ рух дод, хабар медиҳад Вазорати умури дохилаи Тоҷикистон.
Ба иттилои манбаъ, сонеҳаи нақлиётӣ бегоҳи 10 июн, тахминан соати 17:20 дақиқа иттифоқ афтод.
Ронандаи 21 - солаи мошини тамғаи "Опел - Вектра", ҳангоми ҳаракат кардан аз самти шаҳри Норак ба самти шаҳри Ваҳдат, дар километри 37- уми шоҳроҳи Душанбе-Кӯлоб-Хоруғ аз ӯҳдаи идора кардани нақлиёт набаромад.
Дар ҳамин ҳол, мошин бо се мусофир дар канори роҳ чаппа шуд, ки як мусофири 19 - сола, ки сокини шаҳри Ваҳдат буд, дар ҷойи ҳодиса ба ҳалокат расид.
Манбаъ меафзояд, худи ронанда ва ду мусофири ӯ ҷароҳатҳои вазнини ҷисмонӣ бардошта, феълан дар бемористон бистарӣ ҳастанд.
ВУД Тоҷикистон мегӯяд, аз рӯи ин ҳодиса тафтишот идома дорад.