ДУШАНБЕ, 18 мар – Sputnik. Ӯзбекистон низ ба мисли Тоҷикистон дар доираи механизми COVAX ваксини ройгони АstraZeneca - ро дастрас кард. Аммо ин кишвар ҳоло ба эмгузаронии мардум шитоб намекунад ва баръакс хулосаи Созмони ҷаҳонии беҳдошт дар мавриди бехавф будани ин ваксинро интизоранд.
Манобеи Sputnik Ӯзбекистон бо истинод ба муовини вазири беҳдошт Баҳодур Юсупалиев хабар медиҳад, ки мутахассисони тамоми ҷаҳон хулосаи ниҳоии СҶБ дар мавриди ин ваксинро интизоранд.
Аммо муовини вазир таъкид намудааст, ки хулосабарории пешакӣ ҳам чандон дуруст нест. Зеро тромбоз шояд аз миёни як миллион нафар танҳо як кас шавад ва шояд он нафар гирифтори ягон маризии музмин бошад.
Ӯ мегӯяд, ҳолатҳои маргу мири нафарони эмгирифта шояд на ваксин, балки маҳз беморие бошад, ки аз он азият мекашанд.
"Мо ҳамчун иштирокчиёни барномаи COVAX, дар қатори дигар давлатҳо, тавсияҳои СҶБ- ро риоя мекунем. Умедворем, мо ин ваксинро истифода хоҳем кард", - илова намудааст Юсупалиев.
Ёдовар мешавем, ки Тоҷикистон шоми 8 март дар ҳаҷми 192 000 воя ваксини AstraZeneca - ро тавассути парвози махсуси "Сомон - Эйр" аз шаҳри Деҳлӣ дастрас кард.
Феълан дар Тоҷикистон низ марҳилаи эмгузаронӣ шурӯъ нашудааст ва шояд сару садоҳои зиёд дар мавриди таъсири нохуби ин ваксин ба организми инсон, мутахассисони тоҷикро боздоштааст.