ДУШАНБЕ, 30 мар – Sputnik. Президенти Тоҷикистон Эмомалӣ Раҳмон дар шаҳри Хуҷанд барои кормандони соҳаи иҷтимоӣ бинои истиқоматӣ ба истифода дод.
Бино аз 9 ошёна ва 40 хонаи як, ду ва сеҳуҷрагӣ иборат мебошад, хабар медиҳад хадамоти матбуотии преизденти ҶТ.
Гуфта мешавад, ки таъмини кормандони соҳаи тандурустӣ, маориф, фарҳанг, ҳифзи ҳуқуқ ва хизматчиёни давлатӣ бо манзили зист барои баланд бардоштани сатҳи зиндагӣ ва фароҳам овардани шароити арзандаи кору зиндагии омӯзгорон, парасторон ва кормандони соҳаи тиб мусоидат менамояд.
Ҳамин тавр ба 30 нафар кормандони соҳаи маориф ва тандурустӣ калиди хонаҳои истиқоматӣ супорида шуд.
Дар ҳамин ҷо дар ошёнаи дуюми бино Маркази омӯзиши технологияҳои инноватсионӣ ифтитоҳ шудааст.
Ин марказ метавонад ба макони ҷалби истеъдодҳои ҷавон, омӯзгорон ва мутахассисони соҳа ва татбиқи ғояҳои нав дар самти технологияҳои иттилоотӣ ва зеҳни сунъӣ табдил ёбад.
Яке аз самтҳои муҳими фаъолияти Маркази омӯзиши технологияҳои инноватсионӣ татбиқи технологияҳои зеҳни сунъӣ дар соҳаи кишоварзӣ ба ҳисоб меравад, афзудааст манбаъ.
Самти дигари муҳими фаъолияти ин марказ рушди технологияҳои рақамӣ дар соҳаи тандурустӣ гуфта шудааст.