ДУШАНБЕ, 26 янв – Sputnik. Музокирот барои ҳалли буҳрон дар Украина дар Абу Дабӣ ҳафтаи оянда давом дода мешаванд.
Дар ин бора зи душанбе котиби матбуотии президенти Русия Дмитрий Песков изҳор дошт.
"Идомаи музокирот ҳафтаи оянда ба нақша гирифта шудааст", - гуфт ӯ ба хабарнигорон.
Песков афзуд, ки ӯ ҳанӯз санаи дақиқи мулоқотро гуфта наметавонад ва оғози ин равандро мусбат арзёбӣ мекунад.
"Он далел, ки ин тамосҳо ба таври созанда оғоз шудаанд, метавонад мусбат арзёбӣ шавад", - гуфт сухангӯи Кремл.
Ба гуфтаи вай, Кремл ҷузъиёти раванди гуфтушунидро дар Украина ба таври оммавӣ муҳокима намекунад ва Путин аз музокиракунандагони ҷониби Русия пайваста гузоришҳои мустақим мегирад.
Музокирот
Музокироти гурӯҳи кории сеҷониба бо иштироки намояндагони Русия, Иёлоти Муттаҳида ва Украина рӯзи ҷумъа, 23 январ дар Абу Дабӣ оғоз ёфт. Онҳо ду рӯз давом карданд ва рӯзи шанбе ба анҷом расиданд.
Тавре ки ёвари президенти Русия Юрий Ушаков қайд кард, ба ҳайати Русия намояндагони Вазорати дифоъи Русия таҳти роҳбарии сардори Сарраёсати ситоди генералӣ адмирал Игор Костюков, дохил шуданд.
Ҳайати ИМА-ро дар музокирот дар Абу Дабӣ фиристодаи махсуси президент Стив Уиткофф, асосгузори ширкати “Affinity Partners” ва домоди Доналд Трамп, Ҷаред Кушнер, корманди Кохи Сафед Ҷош Грюнбаум, вазири артиш Дэн Дрисколл ва фармондеҳи олии НАТО дар Аврупо генерал Алексус Гринкевич намояндагӣ карданд.
Ҳайати Украинаро котиби Шӯрои амнияти миллӣ ва дифоъ Рустем Умеров, роҳбари дафтари Владимир Зеленский Кирил Буданов (дар Русия ба руйхати террористҳо ва экстремистҳо ворид шудааст), муовини ӯ Сергей Кислица ва раҳбари фраксияи ҳизби ҳокими "Хидматгори мардум" Давид Арахамия намояндагӣ карданд.
Музокирот оид ба Украина дар Абу Дабӣ аввалин музокироте буд, ки дар формати сеҷониба бо иштироки намояндагони Русия, Амрико ва Украина баргузор шуд.