ДУШАНБЕ, 16 янв - Sputnik. Дар мавзеи сайёҳии Искандаркӯл, воқеъ дар ноҳияи Айнии вилояти Суғд, сохтмони иншооти наву замонавии соҳаи сайёҳӣ оғоз гардид.
Дар маросими гузоштани санги асоси иншоот, раиси вилояти Суғд Раҷаб Аҳмадзода ширкат кардааст, хабар медиҳад хадамоти мабуотии раиси вилоят.
Гуфта мешавад, ки иншооти сайёҳӣ, бо ташаббуси соҳибкорон бо мақсади рушди соҳаи сайёҳӣ ва баланд бардоштани сатҳи хизматрасонӣ бунёд мешавад.
Зимни муаррифии лоиҳа иттилоъ дода шудааст, ки маркази хизматрасонӣ ва меҳмонхона дар мавзеи Искандаркӯл, дар масоҳати 1,08 гектар бунёд мегардад.
Лоиҳа сохтмони се бинои сеошёнаи хизматрасонӣ, панҷ бинои якошёна, таваққуфгоҳ, майдончаи варзишӣ, тарабхона ва қаҳвахона, ҷойҳои сайругашт, майдончаи бозии кӯдакон ва дигар инфрасохтори заруриро дар бар мегирад.
Аҳмадзода зимни ошноӣ бо лоиҳа таъкид кардааст, ки сайёҳӣ яке аз соҳаҳои сердаромади иқтисод ба ҳисоб меравад.
Ба гуфтаи раиси вилоят дар ҳамаи шаҳру ноҳияҳои вилояти Суғд ҷиҳати иҷрои саривақтии супоришҳои ҳукумат, корҳои сохтмону навсозии инфрасохтори сайёҳӣ бо маром идома дошта, сатҳи хизматрасонӣ ба сайёҳони дохиливу хориҷӣ сол ба сол беҳтар мегардад.
Ёдовар мешавем, ки давоми нуҳ моҳи соли 2025 шумораи меҳмонони хориҷие, ки тавассути гузаргоҳҳои сарҳадии вилоят Суғд ба ин минтақа ворид гардидаанд, 1,1 млн нафарро ташкил дод.
Ин нишондиҳанда нисбат ба ҳамин давраи соли гузашта 226,7 ҳазор нафар зиёд мебошад.