ДУШАНБЕ, 12 янв - Sputnik. Президенти Тоҷикистон дар сохтори додгоҳӣ, маориф ва вазорати хориҷа тағйироти кадрӣ анҷом дод.
Дар ин бора Хадамоти матбуоти раисҷумҳури Тоҷикистон хабар додааст.
Ба иттилои манбаъ, раисҷумҳури Тоҷикистонфармон дар бораи бозхонди Кенҷазода Муҳаммадҷалолиддин ва Ғуломзода Сафарбек аз вазифаи судяи Суди Олии Ҷумҳурии Тоҷикистон бинобар сабаби ба охир расидани муҳлати ваколаташон ба имзо расонд.
Дар ҳамин ҳол, кишвардори Тоҷикистон Кенҷазода Муҳаммадҷалолиддин, Ғуломзода Сафарбек, Сафарзода Маҳинабону, Раҳмонзода Икром ба вазифаи судяи Суди Олии Тоҷикистон ва Нурализода Одил ба вазифаи судяи Суди Олии иқтисодии Тоҷикистон пешниҳод кард.
Гуфта шудааст, ки пешниҳодҳои раҳбари Тоҷикистон ба Маҷлиси миллии Маҷлисии Олии Тоҷикистон манзур гардиданд.
Ҳамчунин бо фармонҳои Президенти Тоҷикистон раисони суди ноҳияҳои Сино, Шоҳмансур, Мурғоб, Шаҳристон, Вахш, Рашт, Ховалинг, Норак, Рӯдакӣ таъин карда шуданд.
Тағйироти кадрӣ, ҳамчунин дар сатҳи муовинони раисони мақомоти судӣ, судяҳои судҳо ва судҳои иқтисодии вилоятҳои Хатлону Суғд, шаҳри Душанбе ва шаҳру ноҳияҳои кишвар анҷом ёфт.
Ба иттилои манбаъ, инчунитн бо қарорҳои Ҳукумати кишвар се нафар аз ҳисоби кадрҳои корозмуда ва дорои таҷрибаи кофӣ дар соҳаи дипломатия ба вазифаҳои муовинони вазири корҳои хориҷӣ таъин гардиданд.
Ҳамчунин Эмомалӣ Раҳмон муовини якум ва муовини директори Маркази миллии қонунгузории назди Президенти Тоҷикистон, муовини якум ва муовини директори Агентии назорат дар соҳаи маориф ва илм, Директори муассисаи давлатии Институти илмию таҳқиқотии сайёҳӣ ва соҳибкории Донишгоҳи байналмилалии сайёҳӣ ва соҳибкории Тоҷикистон ва раиси Палатаи савдо ва саноати кишвар таъин кард.
Эмомалӣ Раҳмон зимни суҳбат ба мақомдорон гуфт, таъмини адолати судӣ ва волоияти қонун, ҳифзи манфиатҳои давлат ва шаҳрвандони кишвар, назорати беҳсозии сифати таълиму тарбияи насли наврас ва муаррифии шоистаи таърих ва фарҳангу ҳунар дар арсаи ҷаҳонӣ таъмин намоянд.