ДУШАНБЕ, 12 янв - Sputnik. Кумитаи дин, танзими анъана ва ҷашну маросим ба хоҳишмандони зиёрати хонаи Худо ҳушдор дод, ки бо роҳҳои ғайрирасмӣ аз Тоҷикистон ба ҳаҷ нараванд.
Ин ниҳод таъкид намудааст, ки ин амал дар пай ҷаримаи ҳангуфт, депорт ва ҳатто маҳрумият аз озодӣ дорад.
"Тибқи тартиби нави ҷоринамудаи Шоҳигарии Арабистони Саудӣ ба афроде, ки бо роҳҳои ғайрирасмӣ барои адои маносики ҳаҷ сафар мекунанд, ҷарима ба андозаи $13 300, ҳабс ба муддати шаш моҳ ва депорт ба муддати 10 сол таҳдид мекунад", - хабар доданд аз Кумита ба Sputnik Тоҷикистон.
Манбаъ аз шаҳрвандони Тоҷикистон хост танҳо тариқи ширкатҳои ватанӣ ба ҳаҷ раванд ва набояд ба таблиғи бардурӯғи афроди манфиатхоҳ дода шаванд.
Дар ҳамин ҳол, Кумитаи дин хабар дод, ки нархи Ҳаҷ- 2026 барои зоирини тоҷик арзонтар шудааст.
Ба иттилои Кумита арзиши Ҳаҷҷи фарзӣ барои зоирини тоҷик имсол 53 ҳазор сомонӣ муқарар шудааст.
Ин нисбат ба соли гузашта 3800 сомонӣ арзонтар аст.
Таъкид шуд, ки маблағи сафари тавассути “Ориёнбонк” пардохт карда мешавад.
Кумитаи Дин ҳамзамон гуфт, ки Кумита аз ҳоло озмун барои дарёфти роҳбаладонро низ оғоз кардааст.