ДУШАНБЕ, 22 дек - Sputnik. Раиси вилояти Суғд Раҷаб Аҳмадзода бо директори генералии ширкати "Хуавей" дар Тоҷикистон Ма Тян мулоқот анҷом дод.
Дар ин бора дафтари матбуоти раиси вилояти Суғд хабар дод.
Ба иттилои манбаъ, дар мулоқот рафти корҳои омодагӣ ҷиҳати татбиқи лоиҳаи "Шаҳри бехатар" дар шаҳри Хуҷанд мавриди баррасӣ қарор гирифт.
Раҷаб Аҳмадзода зҳимни мулоқот таъкид намудааст, ки тибқи нақша дар маркази вилояти Суғд — шаҳри Хуҷанд татбиқи лоиҳаи "Шаҳри бехатар" пешбинӣ шуда, ҳадафи асосии он назорати ҳаракати нақлиёт, пешгирии садамаҳои роҳу нақлиёт, қонунвайронкуниҳо ва дигар ҳодисаҳои нохуш мебошад.
“Ҷонибҳо вобаста ба марҳилаҳои амалисозии лоиҳа, истифодаи таҷрибаи байналмилалӣ ва дурнамои ҳамкорӣ мубодилаи афкор намуда, масъалаҳои марбут ба татбиқи босифати онро муҳокима карданд”, - қайд кардааст манбаъ.
Мақомоти Суғд хабар додааст, ки ширкати технологии “Хуавей” дар татбиқи лоиҳаҳои марбут ба "Шаҳри бехатар" дорои таҷрибаи калон буда, яке аз бузургтарин лоиҳаҳояш тарҳи “Шаҳри бехатар”, яъне насби камераҳои назоратӣ дар кӯчаҳои шаҳри Душанбе мебошад.
Ёдовар мешавем, ки лоиҳа ба маблағи 25 миллион доллар амалӣ карда мешавад.