ДУШАНБЕ, 8 дек - Sputnik. Шералӣ Кабир вазири саноат ва технологияҳои нави Тоҷикистон дар мусоҳиба ба рӯзномаи “Ҷумҳурият” гуфт, ки бо таъсиси Корпоратсияи миллии зеҳни сунъӣ Тоҷикистон метавонад, ба ин ҳадафҳо ноил шавад.
“Вақте НБО "Роғун" бо иқтидори пуррааш ба кор дарояд, барқи иловагиро ба хориҷи кишвар набароварда, балки онро барои коркарди технологияи зеҳни сунъӣ истифода бурдан имконпазир мешавад.
Вай гуфт, ин кор барои иқтисоди Тоҷикистон нафъи бештар меорад.
Вай таъкид кард, ки ҳоло Тоҷикистон аз ҳамаи захираҳои гидроэнергетикии худ ҳамагӣ 5-6%-и онро истифода мебарад.
“Масалан, тибқи шартномаҳои мавҷуда, барқро бо нархи 5 сент мефурӯшем, вале агар онро барои коркарди технологияи зеҳни сунъӣ истифода намоем, арзиши он то 8 маротиба зиёд мешавад”, - қайд кард Шералӣ Кабир.
Вай илова кард, ки бо ин роҳ Тоҷикистон метавонад маблағҳои иловагӣ ба даст биёрад.
“Албатта, мехоҳем ҳарчи зудтар ин захираро коркард кунем, вале барои ин сармоягузории калон зарур аст. Ба ҳамин хотир, мо барои ворид шудани сармояҳои бузург ба бахши гидроэнергетикаи кишвар дарҳои боз эълон намудаем”, - гуфт ӯ.
Вай афзуд, ки ҳоло ҳиссаи зеҳни сунъӣ дар ММД хеле ночиз аст. Аммо стартапҳои ватанӣ дар ин самт фаъолият доранд ва нишондодҳо умедворкунанда доранд.
Вазири тоҷик илова кард, ки агар Корпоратсияи давлатии зеҳни сунъӣ таъсис дода шавад, албатта, Тоҷикистон метавонад ба ин нишондиҳанда ноил шавад.
Вай гуфт, нақшаҳо барои таъсиси чунин корпоратсия ҳоло дар баррасии Ҳукумат қарор доранд.
Шералӣ Кабир гуфт, ки дар доираи Стратегияи рушди зеҳни сунъӣ то соли 2040 тадбирҳои муҳим андешида мешаванд.
Вай афзуд худи Стратегия имиҷ барои кишвар аст.
"Стратегияи моро Аморати Муттаҳидаи Араб низ омӯхта, мехоҳанд таҷрибаи онро дар давлатҳои худ татбиқ намоянд”, - гуфт Шералӣ Кабир.
Вай зикр кард, ки ин аз он нишон медиҳад, ки Тоҷикистон дар Осиёи Марказӣ дар рушди технологии зеҳни сунъӣ пешсаф аст.