ДУШАНБЕ, 2 дек - Sputnik. Тоҷикистону Туркия корхонаҳои муштараки истеҳсолӣ таъсис медиҳанд.
Ин масъаларо, президенти Тоҷикистон Эмомалӣ Раҳмон бо Маҷлиси Бузурги Миллии Туркия Нуман Куртулмушро баррасӣ кард.
Раҳмон аз сатҳи муносиботи Тоҷикистон ва Туркия, аз ҷумла дар арсаи дипломатияи парлумонӣ, изҳори қаноатмандӣ кардааст, гузориш медиҳад хадамоти матбуотии кишвардор.
Президент гуфтааст, ки "муносиботи фарогир бо Туркия дар сиёсати хориҷии давлати мо мақоми хосса доранд".
Ба муколамаи сиёсии сатҳи олӣ ва баланд ва робитаҳои байнипарлумонии ду кишвар барои густариши робитаҳои гуногунҷанба таваҷҷуҳи зиёд зоҳир карда шуд. Тавсеаи ҳамкории тиҷоративу иқтисодӣ низ аз мавзуъҳои муҳими суҳбат будааст.
"Кишварҳои мо имконият доранд, дар соҳаҳои афзалиятноки саноати нассоҷӣ, коркарди алюминий, амалӣ намудани тарҳҳои сармоягузорӣ дар бахшҳои воқеии иқтисодиёти Тоҷикистон, таъсиси корхонаҳои муштараки истеҳсолӣ дар асоси ашёи хоми маҳаллӣ ҳамкории бештар дошта бошанд".
Фаъолияти Комиссияи муштараки байниҳукуматӣ оид ба ҳамкории иқтисодӣ ва Агентии Туркия оид ба ҳамкории байналмилалӣ василаи муҳими густариши робитаҳои дуҷониба номида шуд.
Ҳарду ҷониб ба густариши ҳамкорӣ дар соҳаҳои маориф, илм, фарҳанг ва сайёҳӣ ҳавасмандии худро таъкид намуданд.
Ҳамчунин, доир ба ҳамкорӣ дар арсаи байналмилалӣ баҳри ҳалли масъалаҳои мубрами байналмилалӣ ва минтақавӣ табодули судманди афкор сурат гирифт.