ДУШАНБЕ, 2 дек - Sputnik. Маркази назорати давлатии санитарию эпидемиологии вилояти Суғд, аз сокинон даъват карда, ки барои пешгирии паҳншавии бемориҳои мавсимӣ чораҳои зарурии беҳдоштӣ ва муҳофизатиро ҷиддан риоя намоянд.
Ин ниҳод сабаби паҳншавии шадид бемориҳои сироятии ГРИП, ОРВИ ва дигар бемориҳои роҳи нафасро ба фарорасии рӯзҳои сард, пастшавии ҳарорат ва зиёдшавии чангу ғубор дар ҳаво гуфт.
Ин ниҳод мегӯяд дар ин давра, диққати бештар ба саломатӣ ва амалисозии тавсияҳои пешгирикунанда аҳамияти калон дорад.
Нишонаҳои беморӣ ва роҳи пешгирӣ
Нишонаҳои аввалини бемориҳои мавсимӣ одатан бо баланд шудани ҳарорати бадан, сулфа, дарди гулӯ, бинипурӣ, хастагии ногаҳонӣ, бадҳолӣ ва дарди мушакҳо оғоз меёбанд. Дар ҳолатҳои вазнин душвории нафаскашӣ мушоҳида мешавад, ки чунин ҳолат талаб мекунад, ки шахс ба муассисаи тиббӣ муроҷиат намояд.
Марказ тавсия медиҳад, ки қоидаҳои гигиенаи шахсӣ, аз ҷумла шустани дастҳо бо собун, риоя карда шаванд.
"Шамол додани мунтазами утоқҳои кориву истиқоматӣ ва пӯшидани ниқоб дар ҷойҳои серодам низ аҳамияти калон дорад. Тавсия дода мешавад, ки шахсони бояд ғизои солим, нӯшокиҳои гарм истеъмол намоянд ва аз худсарона истифода бурдани антибиотикҳо қатъиян худдорӣ кунанд", - тавсия додааст Марказ.
Дар ҳолати пайдо шудани нишонаҳои беморӣ ҳузур дар ҷойҳои серодам тавсия дода намешавад.
"Бемор бояд истироҳати кофӣ гирад ва дар сурати баланд шудани таб ё бадшавии вазъи умумӣ ба табиб муроҷиат намояд. Масъалаи тақвияти масуният тавассути тарзи ҳаёти солим низ аз омилҳои муҳими пешгирикунанда мебошад", - омадааст дар дастурамал.
Маркази назорати давлатии санитарию эпидемиологии вилояти Суғд афзуда, ки риояи тавсияҳои зикршуда метавонад хатари сироятёбӣ ва паҳншавии бемориҳои мавсимиро ба таври назаррас коҳиш диҳад.