ДУШАНБЕ, 1 дек - Sputnik. Бо вуҷуди талошҳои мунтазами ҷониби Тоҷикистон барои ҳифзи амният ва эҷоди фазои ҳамкории мутақобилан судманд дар минтақаҳои наздисарҳадии Тоҷикистон ва Афғонистон амалҳои гурӯҳҳои ҷинояткор барои халалдор намудани вазъият дар сарҳади давлатӣ ба қайд гирифта шуданд.
Дар ин бора хабар додааст дафтари матбуоти Кумитаи давлатии амнияти миллии Тоҷикистон.
Ёдовар мешавем, ки 30 ноябри соли равон аъзои гурӯҳи мусаллаҳи террористӣ аз ҳудуди деҳаи Рузваяки вулусволии Моҳи Майи вилояти Бадахшони Афғонистон ба кормандони ширкати роҳсозии "China Road and Bridge Corporation" дар деҳаи Шодаки ҷамоати деҳоти Вишхарви ноҳияи Дарвози Тоҷикистон ҳамлаи мусаллаҳона анҷом доданд.
Дар натиҷа ду шаҳрванди Чин ба ҳалокат расида, 2 шаҳрванди кишвари мазкур ҷароҳатҳои гуногун бардоштанд.
Айнан чунин амали террористӣ рӯзи 26 ноябри соли ҷорӣ 2025 аз ҳудуди вулусволии Шаҳри Бузурги вилояти Бадахшони Афғонистон ба қаламрави ноҳияи Шамсиддин Шоҳини Тоҷикистон сурат гирифта буд, ки дар натиҷаи он 3 корманди ширкати "Шоҳин-СМ" аз ҳисоби шаҳрвандони Чин ба ҳалокат расида, як нафар захмӣ гардид.
КДАМ Тоҷикистон аз ин амал изҳори нигаронии амиқ карда ин амалҳои мудҳиши гурӯҳҳои ҷиноятиро қотеъона маҳкум кардааст.
КДАМ аз мақомоти феълии Афғонистон барои андешидани тадбирҳои муассири саривақтӣ барои таъмини амну субот дар хатти сарҳади давлатии ду кишвар ва дастгир намудани афроди ба ин амалҳои мудҳиш дастдошта, даъват кард.
Қайд карда шудааст, ки давлати Тоҷикистон барои таҳкими сарҳади давлатӣ ва таъмини амнияти шаҳрвандони кишвар ва хориҷӣ чораҳои иловагӣ меандешад.
Таъкид карда шудааст, ки айни замон вазъ дар сарҳади давлатӣ ором ва таҳти назорати мақомоти дахлдори Тоҷикистон аст.
Зикр карда шудааст, ки таҳқиқи ҳодисаҳои мазкур аз тарафи мақомоти ҳифзи ҳуқуқи кишвар идома дорад.
*-гурӯҳ барои амалҳои террористиаш таҳти таҳримҳои СММ қарор дорад.