ДУШАНБЕ, 3 ноя - Sputnik. Президенти ИМА Доналд Трамп дар мусоҳиба бо шабакаи телевизионии CBS гуфт, ки раҳбарони Русия ва Чин Владимир Путин ва Си Ҷинпин мардони қавӣ ва доно ҳастанд, ки набояд бо онҳо бозӣ кард.
"Ҳарду сахтгиранд, ҳарду доноанд... ҳарду раҳбарони хеле қавӣ ҳастанд. Шумо наметавонед бо ингуна одамон бозӣ кунед", - гуфт ӯ.
Роҳбари Кохи Сафед инчунин эътироф кард, ки Русия захираҳои бузурги силоҳи ҳастаӣ дорад. Ӯ гуфт, ки бо Русия ва Чин дар бораи аз силоҳи ҳастаӣ даст кашидан сӯҳбат кардааст.
"Ман боварӣ дорам, ки мо бояд дар бораи аз силоҳи ҳастаӣ даст кашидан коре анҷом диҳем ва ман дар ҳақиқат ин масъаларо бо президент Путин ва ҳам бо президент Си муҳокима кардам", - афзуд раҳбари Амрико.
Ӯ инчунин нақшаҳои худро барои гузаронидани озмоишҳои ҳастаӣ такрор кард.
"Мо бояд бубинем, ки он чӣ гуна кор мекунад. Сабаби сухан гуфтани ман дар бораи озмоиш ин аст, ки Русия нияти худро барои озмоиш эълон кардааст, Кореяи Шимолӣ пайваста озмоиш мекунад ва дигар кишварҳо низ. Мо ягона кишваре ҳастем, ки озмоиш намегузаронем. Ман намехоҳам ягона кишваре бошам, ки озмоиш намегузаронад", - қайд кард раҳбари ИМА.
Мусоҳиб ба ӯ хотиррасон кард, ки Маскав танҳо системаҳои интиқолро озмоиш мекунад, на силоҳи ҳастаӣ. Бо вуҷуди ин, Трамп изҳор дошт, ки Русия ва Чин гӯё чунин озмоишҳоро анҷом медиҳанд, "аммо онҳо дар ин бора гап намезананд".
Ёдовар мешавем, ки чанде пеш, раҳбари Амрико эълон кард, ки фармони оғози фаврии озмоиши силоҳи ҳастаиро додааст. Ӯ қарори худро бо ишора ба дигар кишварҳо, ки гӯё ҳамин корро анҷом додаанд, асоснок кард.
Дмитрий Песков, сухангӯи президенти Русия, изҳор дошт, ки агар ягон кишвар мораторияи озмоишҳои ҳастаиро вайрон кунад, Маскав мувофиқан амал хоҳад кард.
Вай қайд кард, ки Вашингтон Маскавро дар бораи нияти худ барои гузаронидани чунин озмоишҳо огоҳ накардааст.