ДУШАНБЕ, 7 окт — Sputnik. Вазорати умури хориҷии Тоҷикистон хабар додааст, ки дар ҷараёни сафари давлатии президенти Русия Владимир Путин ба Тоҷикистон, ки рӯзҳои 8-9 октябр сурат мегирад, як қатор санадҳои байнидавлатӣ ва байниҳукуматӣ ба имзо мерасад.
"Рӯзҳои 8-9 октябр, раисиҷумҳури Русия Владимир Владимирович Путин ба Тоҷикистон сафари давлатӣ анҷом медиҳад. Дар доираи ин сафар маросими гузоштани гулчанбар ба пояи муҷассамаи Исмоили Сомонӣ, мулоқоти як ба як ва густурда, ҳамчунин имзои як қатор санадҳои байнидавлатӣ ва байниҳукуматӣ дар назар аст", — қайд кардааст ВУХ-и Тоҷикистон.
Пас аз ин музокирот нишасти хабарии раҳбарони Тоҷикистону Русия баргузор мешавад.
Моҳи сентябри соли равон, сафири Русия дар Тоҷикистон Семён Григорьев зимни посух ба суоли хабаргузории ТАСС дар нишасти хабарӣ хабар дода буд, ки қарор аст дар ҷараёни сафари давлатии Путин ба Тоҷикистон созишномаи сармоягузорӣ дар бораи парки саноатӣ дар Душанбе, ки Тоҷикистону Русия ба таври муштарак таҳия кардаанд, ба имзо мерасонанд.
Ба гуфтаи вай, ҷонибҳои Русия ва Тоҷикистон ҳамчунин доираи васеи масоил, аз ҷумла ҳамкориҳои иқтисодӣ ва башардӯстона ва вазъи минтақаро баррасӣ хоҳанд кард.
Қаблан Путин дар паёми шодбошӣ ба Эмомалӣ Раҳмон ба муносибати 34-умин солгарди истиқлоли Тоҷикистон аз рушди бомуваффақияти шарикӣ ва иттифоқии стратегии ду кишвар ёдовар шуда, ба густариши минбаъдаи равобити созанда изҳори боварӣ карда буд.
Дар солҳои ахир бештари табодули коло Тоҷикистон бо кишварҳои Русия ва Чин доштааст. Мубодилоти мол миёни Тоҷикистону Русия аз моҳи январ то августи соли ҷорӣ беш аз 1,4 миллиард долларро ташкил дода, 13% афзоиш ёфтааст. То охири соли 2024 гардиши мол миёни ду кишвар тақрибан 1,9 миллиард долларро ташкил медиҳад, ки нисбат ба соли 2023 15% зиёдтар аст.
Дар моҳи март, дар пайи музокирот бо Раҳмон дар Кремл, Путин изҳор дошт, ки Маскав ва Душанбе талош доранд, то соли 2030 мизони табодули колоро 2,5 баробар афзоиш диҳанд.