ДУШАНБЕ, 2 сен — Sputnik. Раисҷумҳури Тоҷикистон Эмомалӣ Раҳмон дар мулоқот бо сарвазири Покистон Шаҳбоз Шариф алоқамандии Тоҷикистонро ба рушду тавсеаи муносибатҳои гуногунҷанбаи ду кишвар таъкид намуд.
Тавре Хадамоти матбуоти раисҷумҳури Тоҷикистон хабар додааст мулоқоти роҳбарони ду кишвар дар шаҳри Пекин дар доираи сафари корӣ ба Чин сурат гирифт.
Ба иттилои Хадамоти матбуот роҳбарони ду кишвар дар ин дидор масоили таҳкиму тавсеаи робитаҳои ду кишвар дар арсаи сиёсӣ, тиҷорату иқтисод, бахусус энергетика ва нақлиёт, фарҳанг, илму маориф, техника ва амнияту мудофиа муҳокима намуданд.
“Рушди минбаъдаи ҳамкории байнипарлумонӣ зарур дониста шуд”, - қайд кардааст манбаъ.
Ҳамчунин қайд карда шудааст, ки дар роҳи баррасӣ ва ҳалли маҷмӯи масъалаҳои ҳамкории иқтисодию тиҷоратӣ, фарҳангиву гуманитарии ду кишвар нақши Комиссияи муштараки байниҳукуматӣ муҳим дониста шуд.
Ҷонибҳо хостори бештар фаъол гардидани дигар василаҳои пешбурди ҳамкорӣ, аз ҷумла Гурӯҳи кории нафту газ, энергетика ва Шӯрои муштараки соҳибкорон шуданд.
Тарафҳо қайд карданд, ки дар шароити кунунӣ барои ҳар ду ҷониб ҳамкорӣ дар соҳаи нақлиёт аҳамияти калидӣ дорад.
Дар ин самт таъсиси Шурои муштараки ширкатҳои боркашонии ду кишвар иқдоми муассир шумурда шуд.
Алоқамандии Тоҷикистон барои дастрасӣ ба долонҳои байналмилалии нақлиётӣ ва бандарҳои чаҳонӣ иброз гардид.
Ҳамкорӣ дар соҳаи гидроэнергетика ва рушди бозори неруи барқ дар минтақа, аз ҷумла татбиқи саривақтии тарҳи КАСА-1000 муҳим арзёбӣ гардид.
Эмомалӣ Раҳмон ва Шаҳбоз Шариф зимни баррасии масоили ҳамкорӣ дар соҳаи амният мавзуи мубориза бо терроризми байналмилалӣ, ифротгароӣ, ба пешгирӣ аз гардиши ғайриқонунии маводи мухаддир ва дигар зуҳуроти ҷинояткории муташаккили фаромилӣ таваҷҷуҳ зоҳир карданд.
Қайд карда шудааст, ки зимни суҳбат натиҷаҳои ҷаласаи Шурои сарони давлатҳои аъзои Созмони ҳамкории Шанхай, масъалаҳои алоҳидаи рӯзномаи байналмилалӣ ва минтақавӣ низ мавриди таваҷҷуҳи ҷонибҳо баррасӣ шуданд.