ДУШАНБЕ, 23 июн — Sputnik. Дар охири моҳи июн дар Тоҷикистон як ҷашни муҳими давлатӣ таҷлил мешавад.
Чун анъана дар кишвар Рӯзи Ваҳдати миллӣ 27 июн қайд мешавад.
Он тибқи фармони президенти Тоҷикистон таъсис ёфта, дар Қонуни Ҷумҳурии Тоҷикистон аз 22 майи соли 1998 "Дар бораи рӯзҳои ид" ва моддаи 83-и Кодекси меҳнат қайд карда шудааст.
Ин сана дар кишвар расман рӯзи истироҳат буда, тоҷикистониён онро бо ширкат дар чорабиниҳои тантанавӣ ва ҷамъомадҳои мегузаронанд.
Имсол санаи муҳим ба рӯзи ҷумъа рост меояд, аз ин рӯ дар Тоҷикистон ҳафтаи охири моҳ кӯтоҳ хоҳад буд - шаҳрвандон се рӯз паиҳам - аз 27 то 29 июн истироҳат мекунанд.
Ҳафтаи кӯтоҳи корӣ дар Тоҷикистон бахшида ба Рӯзи Ваҳдати миллӣ
© Sputnik
Ҷашн дар саросари кишвар бо баргузории барномаҳои рангини фарҳангӣ ва дигар чорабиниҳо гузаронида мешавад. То кунун дақиқ нест, ки раисҷумҳури кишвар ин ҷашнро дар кадом минтақаи кишвар мегузаронад.
27 июн дар Тоҷикистон аз соли 1997 ба ин сӯ ҳамчун Рӯзи Ваҳдати Миллӣ таҷлил мешавад.
Дар ин рӯз дар шаҳри Маскави Русия Созизномаи истиқрори сулҳ ва ризоияти миллӣ миёни ҳукумат ва мухолифини Тоҷикистон ба имзо расида буд, ки амалан бар ҷанги дохилӣ дар кишвар нуқта гузошт.