ДУШАНБЕ, 23 май — Sputnik. Варзишгари тоҷик Мадина Қурбонзода дар мусобиқаи байналмилалии Ҷоми Осиё-2025 миёни наврасон дар Тошканд медали тило ба даст овард.
Дар ин бора аз Кумитаи кор бо ҷавонон ва варзиши ҷумҳурӣ хабар доданд. Гуфта мешавад, вай дар вазни 52 кг мақоми аввалро касб кардааст.
Мадина Қурбонзода хонандаи синфи 11-и Муассисаи таҳсилоти миёнаи умумии №19-и ноҳияи Синои шаҳри Душанбе аст.
Номбурда дар мусобиқаи бонуфузи Dushanbe Grand Slam-2025 медали биринҷӣ ба даст овард.
Ёдовар мешавем, ки мусобиқаи байналмилалии “Ҷоми Осиё-2025” рӯзи 22 май дар Тошканд оғоз шуд.
Мусобиқаҳо аз рӯи 22 намуди варзиш гузаронда мешаванд. Дар ин чорабиниии варзишӣ 515 нафар аз 8 мамлакат иштирок мекунанд.