ДУШАНБЕ, 22 мая — Sputnik. Дар доираи Форуми соҳибкорию сармоягузории Тоҷикистон ва Арабистони Саудӣ, мулоқоти муовини Вазири энергетика ва захираҳои оби Тоҷикистон Манучеҳр Сафарзода бо Президенти Федератсияи палатаҳои тиҷоратии Арабистони Саудӣ Ҳасан Ал-Ҳувайзӣ баргузор гардид.
Дар ин бора дафтари матбуоти вазорати энергетика ва захираҳои оби Тоҷикистон хабар додааст.
Ба иттилои вазорат, тарафҳо дар ҷараёни вохӯрӣ масъалаи ҷалби сармояи ширкатҳои Саудӣ ба соҳаи энергетикаи Тоҷикистонро мавриди баррасӣ қарор доданд.
Ҳамчунин роҳбарияти ду кишвар ба татбиқи лоиҳаҳои муштарак таваҷҷуҳи хос зоҳир намуданд.
Ҳамчунин, зимни суҳбат масъалаҳои рушди ҳамкории дуҷониба дар бахшҳои энергетика ва захираҳои об баррасӣ шуда, ҷонибҳо табодули афкор анҷом доданд.
Ёдовар мешавем, ки ахиран дар шаҳри Душанбе Форуми соҳибкорию сармоягузории Тоҷикистон ва Арабистони Саудӣ бо иштироки доираҳои давлатӣ ва бахши хусусии ду давлат баргузор гардид.
Зимни чорабинӣ, ҷонибҳо ҳавасмандии худро ҷиҳати тавсеи ҳамкориҳо дар самти рушди “иқтисоди сабз”, энергетика, рақамикунонӣ ва инноватсия, саноати маъдан, металлургӣ, кимиё, истеҳсоли масолеҳи сохтмон, нассоҷӣ, хӯрокворӣ, дорусозӣ, кишоварзӣ, нақлиёт ва сайёҳӣ иброз намуданд.
Ҳамзамон, дар ҳошияи Форум мулоқотҳои дуҷонибаи байни доираҳои давлатӣ ва бахши хусусӣ дар сиғаи В2G ва B2B баргузор гардид.
Дар фарҷоми Форум байни Палатаи савдо ва саноати Тоҷикистон Федератсияҳои палатаҳои савдои Арабистони Саудӣ санади ҳамкорӣ ба имзо расонида шуд.