ДУШАНБЕ, 13 май — Sputnik. Русия ва кишварҳои Осиёи Марказӣ ҳадаф доранд, ки системаи ягонаи савдои муташаккил ва ташаккули махзани маълумот оид ба нархгузории захираҳои энергетикиро таъсис диҳанд.
Дар ин бора ҳокими вилояти Перм Дмитрий Махонин дар ҷаласаи пленарии конфронси энергетикии UEW-2025 дар Тошканд изҳор дошт.
Губернатор ёдовар шуд, ки дар биржаҳои фондии Федератсияи Русия, пеш аз ҳама дар биржаи ашёи хоми Санкт-Петербург як платформаи иттилоотӣ-таҳлилӣ таъсис дода шуда, торафт бештар агентиҳои таҳлилӣ шарики он мегарданд.
Вай қайд кард, ки дар чаҳорчӯби кори Комиссияи Авруосиё низ барои ташаккули бозорҳои нафту маҳсулоти нафтӣ дар ИИАО корҳои зиёде идома дорад.
Ёдовар мешавем, ки аз 13 то 15 май дар Тошканд Ҳафтаи энергетикии Ӯзбекистон UEW-2025 ҷараён дорад.
Ин ҳамоиш ва намоишгоҳи асосии комплекси сӯзишворию энергетикии ҷумҳурӣ мебошад.
Дар намоишгоҳи умумӣ 465 ширкат ва 1400 нафар намояндагон аз 34 мамлакат иштирок мекунанд.