ДУШАНБЕ, 8 май – Sputnik. Дар баробари раисҷумҳурӣ Тоҷикистон, раисони вилоятҳо ва шаҳру навоҳӣ низ барои собиқадорони Ҷанги Бузурги Ватанӣ дар вилояти Хатлон кумакпулӣ расонданд.
Барои ҳар 17 штирокчии Ҷанги Бузурги Ватанӣ аз Тоҷикистон, ки феълан дар қайди ҳаётанд, аз хазинаи захиравии президенти кишвар 50 ҳазор сомонӣ ҷудо карда шудааст.
Раисони ноҳияҳо ва вилоятҳо дар соли равон барои куҳансарбозон маблағҳои мухталиф ҷудо намуданд.
Барои мисол Рустами Эмомалӣ, раиси шаҳри Душанбе дар арафаи ҷашни 80 - умин солгарди Ғалаба дар Ҷанги Бузурги Ватанӣ ба куҳансарбозони тоҷик дар ҳаҷми 25 ҳазор сомонӣ кӯмакпулӣ ҷудо кард.
Пардохтҳо ба собиқадорон дар Тоҷикистон ба муносибати Рӯзи Ғалаба
© Sputnik
Мақомоти вилояти Суғд бошад, бо қарори раиси вилоят Раҷаббой Аҳмадзода ба ҳар як собиқадори Ҷанги Бузурги Ватанӣ 15 ҳазор сомонӣ кӯмакпулӣ ихтисос доданд.
Инчунин раиси вилоят Хатлон ва роҳбарони Ноҳияҳои тобеъи ҷумҳурӣ эълон карданд, барои ҳар як собиқадори Ҷанги Бузурги Ватанӣ маблағи иловагӣ дар ҳаҷми 10 ҳазор сомонӣ супурда мешавад.
Дар вилоятҳо аллакай раисон шахсан ба хонаҳои куҳансарбозон рафта, туҳфаи президенти Тоҷикистон Эмомалӣ Раҳмон бо маблағи 50 ҳазор сомонӣ ва маблағи ҷудонамудаи худро тақдим карданд.
Маврид ба зир аст, ки дар Тоҷикистон имсол ҳамагӣ 17 собиқадори Ҷанги Бузурги Ватанӣ боқӣ мондаанд, ки бузургтарин ва хурдтарини онҳо 112 ва 99 - сола буда, ҳар ду сокинони шаҳри Ҳисор мебошанд.