ДУШАНБЕ, 29 апр — Sputnik. Дар ноҳияи Кӯҳистони Мастчоҳ бар асари омадани сел бинои як масҷид хариб зери об мемонд.
Дар ин бора дафтари матбуоти Кумитаи ҳолатҳои фавқулодаи Тоҷикистон иттилоъ дод.
Бар хабари манбаъ, бар асари гармшавии ҳаво ва об шудани барф обанбори дар наздикии деҳа қарор дошта рахна шуд.
Дар натиҷа сел роҳҳои маҳаллиро зери об монд.
Илова бар ин, 2 бинои истиқоматӣ, 1 бинои масҷид ва 8 бинои ёрирасони сокинон зери хатари обхезӣ қарор доранд.
Манбаъ афзуд, феълан дар ҷои ҳодиса комиссияи ҳолатҳои фавқулодаи ноҳия барои гузаронидани чорабиниҳои пешгирикунанда кор мекунад.
Дар ҳамин, Кумитаи ҳолатҳои фавқулода ёдовар шуд, ки хавфи омадани сел то охири моҳи апрел боқӣ мемонад.
Ин ниҳод аз сокинон хост, барои пешгирӣ аз оқибатҳои нохуши офати табиӣ, қаблан селроҳаҳо ва заҳбурҳоро аз хасу хошок тоза кунанд. Инчунин дархост намуд, ки дар рӯзҳои хатарнок ба кӯҳу дара барои чаронидани чорво, ҷамъ кардани алафу ҳезум ва дигар корҳои хоҷагӣ нараванд.