ДУШАНБЕ, 22 апр — Sputnik. Дар шаҳри Душанбе Ҷаласаи чоруми Комиссияи байниҳукуматии Тоҷикистону Арманистон оид ба ҳамкориҳои иқтисодӣ баргузор гардид, иттилоъ додааст дафтари матбуоти вазорати иқтисод ва савдои Тоҷикистон.
Вазири рушди иқтисод ва савдои Тоҷикистон Завқизода Завқӣ, ки ҷаласа таҳти роҳбарии ӯ баргузор гардид, таъкид кард, ки муносибатҳои ду кишвар пайваста рушд карда, ба сатҳи олӣ баромаданд.
Қайд карда шудааст, ки дар ҷаласаи Комиссияи байниҳукуматӣ масъалаҳои рушди ҳакориҳои тиҷоратию иқтисодӣ, сармоягузорӣ, саноатӣ, кишоварзӣ, сайёҳӣ, экологӣ, маориф ва тандурустӣ муҳокима гардида, ҷонибҳо ба мувофиқа расиданд, ки вобаста ба таъсиси корхонаҳои муштараки саноатӣ, инчунин масъалаҳои марбут ба энергетика ва рушди сабз, аз ҷумла ташаббусҳои муштарак дар соҳаи манбаъҳои барқароршавандаи энергия — сохтмони НБО-и хурду миёна ва рушди энергетикаи офтобӣ бо ҷалби сармояи мустақим корбарӣ менамоянд.
Оқои Завқизода дар ин ҷаласа қайд кад, ки гарчанде гардиши савдои хориҷӣ дар соли 2024 ду баробар афзоиш ёфта бошад, ҳаҷми он ҷавобгӯи иқтидорҳои мавҷудаи ҳар ду кишвар нест.
Ҳамзамон таъкид гардид, ки баргузор намудани форумҳои муштараки соҳибкорӣ, иштирок дар намоишгоҳҳои байналмилалӣ ва мубодилаи таҷрибаи ҳайатҳои соҳибкорӣ имконоти нави густариши гардиши савдои дуҷонибаро фароҳам меорад.
Зикр гардидааст, ки ққдомҳои номбурда барои афзоиши истеҳсоли молҳои саноатӣ, ҷалби сармоя, ташкили ҷойҳои нави корӣ, баланд бардоштани иқтидори содиротӣ ва таҳкими ҳамкориҳои саноатӣ дар ҳарду кишвар мусоидат менамоянд.
Оқои Завқизода ҳайати Арманистонро барои иштирок дар Конфронси сатҳи баланди байналмилалӣ оид ба ҳифзи пиряхҳо, ки 29-31 майи соли 2025 дар шаҳри Душанбе баргузор мегардад, даъват кард.
Вазири иқтисоди Арманистон Геворг Папоян, ки дар ин ҷаласа ҳайати ин кишварро роҳбарӣ мекард, ҳавасмандии кишварашро бариои тавсеаи ҳамкориҳои мутақобилан судманд ва рушди тиҷорати дуҷониба иброз намуд.
Дар доираи ҷаласаи мазкур ҳамраисони Комиссияи Тоҷикистону Арманистон Протоколи ҷаласаи чоруми Комиссияи байниҳукуматии Тоҷикистону Арманистонро ба имзо расониданд.
Чорабиниҳо омодагии худро барои густариши ҳамкориҳо ва амалисозии лоиҳаҳои муштараки саноатӣ, тиҷоратӣ, сармоягузорӣ, илмӣ ва фаннӣ баён намуданд.