ДУШАНБЕ, 26 мар — Sputnik. Шаби Қадр шаби муайяншавии тақдир, ғолибан шаби 27-уми моҳи Рамазон аст, ки беҳтарин вақт барои ибодат буда, дар он дуову ибодат зуд иҷобат меёбад, эълон дошт Шӯрои уламои Тоҷикистон.
Тавре Шӯрои уламо қайд кардааст, соли равон шаби қадр шаби 26 ба 27-уми март фаро мерасад.
Ин ниҳод зикр намудаст, ки дар моҳи Рамазон шабе ҳаст бо номи шаби Қадр, ки дар назди Худованд аз ҳазор моҳ беҳтар ва боарзиштар аст.
“Шабе, ки дар миёни осмону замин ва башарият бо олами улвӣ ва фариштагон робитаи бевоситае барқарор гардид ва дар он нузули Қуръон бар дили поки охирин паёмбари Худо Ҳазрати Муҳаммад (с) оғоз гардид. Шабе, ки ҷаҳони ҳастӣ бо шодмонии нотакроре онро пешвоз гирифт ва ҳодисаеро бо он азамат ва шукӯҳ ҳаргиз надида буд”,- қайд кардааст манбаъ.
Шӯрои уламо бо такя ба сураи Қуръон бо номи "қадр" аз 4 хусусият ва фазилати шаби қадр ишора намудаст, ки якумаш нузули Қуръони карим дар ҳамин шаб оғоз гардидааст.
Шаби Қадр ё шаби бузург ва муайяншавии қисмат
© Sputnik
Дувум он шаб аз ҳазор моҳ беҳтар мебошад, сеюм фариштагон он шаб барои анҷоми корҳои муайяне бо амри Парвардигор ба замин меоянд.
Чаҳорум, он шаб то саҳар дар сар то сари олами офариниш садои салому дуруди офаридагони Худованд баланд мешавад ва дар он то субҳ нуру баракат ва амну осоиш ҳукмфармост, тавзеҳ додаст Шӯро.
Шӯрои уламо илова намудаст, ки паёмбар (с) дар қисмати охири ҳадисе, ки фазилати моҳи Рамазонро баён менамояд, мефармоянд:
"Дар он моҳ шаби қадр аст, ки аз ҳазор моҳ беҳтар аст. Касе аз хайру (баракоти) он шаб маҳрум гардад, маҳруми (бадбахти) ҳақиқӣ ҳамон кас аст", - овардааст ин ниҳод аз қавли паёмбар.
Шаби Қадр дар шабҳои тоқи даҳ рўзи охири моҳи Рамазон мебошад. Вале баъзе донишмандон дар шаби бисту ҳафтуми Рамазон будани шаби Қадр ба яқин наздиктар гуфтаанд.