ДУШАНБЕ, 19 мар — Sputnik. Тариқи овоздиҳии пинҳонӣ вакилонони тозаинтихоб Файзалӣ Идизодаро ба мақоми раиси парлумони Тоҷикистон интихоб карданд.
Файзалӣ Идизода вакил аз ҳавзаи интихоботии Рашт №12 мебошад, ки бо ҳамовозии вакилони тозаинтихоб раиси Маҷлиси намояндагони Тоҷикистон интихоб гардид.
Файзалӣ Идизода то гузаштанаш ба парлумон дар соли 2021-ум дар вазифаи сардори Раёсати маориф, фарҳанг ва иттилооти Дастгоҳи иҷроияи Президенти Тоҷикистон кор мекард.
Вай 3 январи соли 1977 дар ноҳияи Рашт таваллуд шуда, узви ҲХДТ мебошад.
Бар асоси ҳолнома соли 1998 Донишгоҳи миллии Тоҷикистон ва соли 2011 Институти давлат ва ҳуқуқи Академияи илмҳои Федератсияи Русияро дар шаҳри Маскав бо ихтисоси ҳуқуқшинос хатм кардааст.
Идизода фаъолияташро аз пулиси андозу додситонии ҳарбӣ оғоз намуда, баъдан дар факултаи ҳуқуқшиносии Донишгоҳи миллии Тоҷикистон ба ҳайси омӯзгору ноиби декан кор кардааст. Ӯ инчунин дар мақоми ректори Донишкадаи омӯзгории Тоҷикистон дар ноҳияи Рашт фаъолият доштаст.
Ҳамзамон дар аввалин ҷаласа интихоби роҳбарони сохторҳои Маҷлиси намояндагони Маҷлиси Олии Тоҷикистон сурат гирифт.
Қайд карда шудааст, ки котиботи иҷлосия, муовини якум ва муовинони раиси Маҷлиси намояндагон тавассути воситаҳои овоздиҳии электронӣ интихоб карда шуданд.
Ба вазифаи муовини якуми раиси Маҷлиси намояндагони Маҷлиси Олии Тоҷикистон Шермуҳаммад Шоҳиён ва муовинҳои Раиси парлумон—Мавсума Муинӣ ва Азиз Гиёзода интихоб гардиданд.