ДУШАНБЕ, 14 мар — Sputnik. Ҳавопаймои ширкати “Сомон-Эйр” пас аз чор соли танаффус нахустин парвоз дар масири Душанбе-Бишкекро анҷом дод.
Дар ин бора Ҷамила Ҳусейнзода, сухангӯи фурудгоҳи Душанбе бо гузоштани чанд аксу видео аз парвози ширкати ватанӣ ба Бишкек хабар дод.
Ба иттилои ӯ, ҳавопаймо як ҳайати расмии Тоҷикистон ва намояндагони ВАО - ро аз Душанбе ба Бишкек бурд.
Дар фурудгоҳи шаҳри Бишкек ҳавопаймои "Сомон эйр" - ро бо арки обӣ пешвоз гирифтанд.
"Дар назар аст парвоз дар масири Душанбе-Бишкек-Душанбе анҷом ёфта, ҳайати Тоҷикистон шоми 14 март ба Душанбе бармегардад", - афзуд манбаъ.
Қайд карда шудааст, ки иқдоми мазкур омили таҳкими дӯстӣ миёни мардуми ду кишвар буда, он инчунин ба рушди соҳаҳои иқтисодию сайёҳии ду кишвар кумак хоҳад кард.
Бояд гуфт, парвозҳо дар масири Душанбе-Бишкек-Душанбе аз соли 2021 қатъ карда шуд.
Як рӯз қабл ширкати ҳавопаймоии "Сомон Эйр" хабар дод, ки нахустин парвоз рӯзи 14 март сурат мегирад ва пасон аз 23 март ҳар ҳафта рӯзҳои якшанбе парвоз дар ин самт анҷом меёбад.
Арзиши имрӯзаи чипта 87 евра, муодили 1000 сомонӣ гуфта шуда буд.
Ҷониби Қирғизистон ҳоло дар мавриди ифтитоҳи парвозҳо иттилоъ нашр накардааст.