ДУШАНБЕ, 25 фев — Sputnik. Ахиран раиси вилояти Хатлон Давлаталӣ Саид ва раиси Кумитаи ҳолатҳои фавқуллода ва мудофиаи граждании Тоҷикистон Раҷабалӣ Рахмоналӣ аз майдони "70-солагии азхудкунии водии Вахш" ва теппаи Қӯрғон дар шаҳри Бохтар боздид намуданд.
Дар ин бора дафтари матбуоти раиси вилояти Хатлон хабар додааст.
Раиси вилоят дар майдони "70-солагии азхудкунии водии Вахш" аз соҳили рӯде, ки аз миёни ин майдон мегузарад ва бинобар сабаби боришоти барфу борон деворпояҳои паҳлӯи он ба ҳолати садамавӣ дучор шудаанд, боздид намуда, барои рафъи ин мушкилот ба мақомоти дахлдор дастур дод.
Раиси вилоят Давлаталӣ Саид ба масъулон супориш дод, ки дар ҳамкорӣ бо Агентии ҳифзи мероси таърихию фарҳангии Тоҷикистон баҳри азнавсозии теппаи мазкур чораҳои зарурӣ андешанд.
Дар теппаи Қӯрғон, ки соли 1999 бозсозӣ шуда, ба ифтихори ҷашни 1100-солагии давлати Сомониён мавриди баҳрабардорӣ қарор дода шудааст, то чанд муддат пеш осорхонаи таъриху кишваршиносии "Бибихонум"-и шаҳри Бохтар воқеъ буд.
Теппаи Қӯрғон маъруфтарин иншооти таърихӣ дар маркази маъмурии вилояти Хатлон - шаҳри Бохтар маҳсуб гардида, мавзеи тамошои садҳо сайёҳони ватаниву хориҷӣ маҳсуб меёбад, аммо бо сабаби садамавӣ буданаш ҳоло дарҳои худро бастааст.