ДУШАНБЕ, 11 дек — Sputnik. Вазири рушди иқтисод ва савдои Тоҷикистон Завқизода Завқӣ Амин дар мулоқот бо Директори Бонки АвруОсиёгии Рушд дар Тоҷикистон Якунин Владимир, даъват кард, ки маблағгузории БАОР ба лоиҳаҳои афзалиятноки иқтисоди кишварро зиёд намояд.
Дар ин бора дафтари матбуоти вазорати иқтисод ва савдои Тоҷикистон хабар додааст.
Ба иттилои манбаъ, вазир ба хусус даъват кард, ки маблағгузориро ба соҳаҳои саноат, энеркетика, кишоварзӣ, сайёҳӣ, савдо, маориф, тандурустӣ ва рақамикунонии иқтисоди миллӣ, бахусус рақамикунонии бизнес-ҷараёнҳо дар вазорат зиёд намоянд.
“Пешниҳодҳо вобаста ба зиёд намудани ҳаҷми маблағгузорӣ аз ҷониби Директори БАОР дар Ҷумҳурии Тоҷикистон бо хушнудӣ пазируфта шуд”, - қайд кардааст вазорати иқтисод.
Қайд карда шудааст, ки дар анҷоми вохӯрӣ ҷонибҳо омодагии худро оид ба таҳияи лоиҳаҳои нави афзалиятноки соҳаҳои иқтисоди миллӣ, бахусус оид ба таъсиси кластери нассоҷӣ ва маркази логистикии муосир, инчунин ҳамкориҳои дуҷонибаи судманд изҳор намуданд.
Ёдовар мешавем, ки соли гузашта БАОР эълон карда буд, ки барои татбиқи лоиҳаҳои афзалиятнок дар Тоҷикистон 650 миллион доллар ҷудо мекунад.
Ба иттилои вазорати иқтисод, тибқи созишнома маблағ дар давоми се сол аз соли 2023 то 2026 дода мешавад.