ДУШАНБЕ, 18 ноя — Sputnik. Ахиран дар сомонаи вазорати адлияи кишвар лоиҳаи созишнома байни ҳукумати Тоҷикистон ва Қазоқистон дар бораи ҳамкорӣ дар бахши барқу энергетика ба нашр расид.
Тибқи ин лоиҳа, интиқоли нерӯи барқи пешбинишудаи Роғун тавассути хатҳои интиқоли барқи байнидавлатӣ бо назардошти имконоти фаннии кишварҳои ҳамсоя барои транзит сурат мегирад.
"Маркази ҳисоббаробаркунию молиявии дастгирии энергияи барқароршаванда", ки як созмони тобеи Вазорати энергетикаи Қазоқистон мебошад, тибқи созишнома дар бораи интиқоли нерӯи барқ бо ҶСК "НБО Роғун" шартнома мебандад.
Мӯҳлати шартнома 20 сол бо имкони тамдиди 10 сол мебошад.
Таъмини нерӯи барқи ба нақша гирифташуда аз НБО Роғун танҳо дар давраи норасоӣ дар минтақаи шимолу ҷанубии Низоми ягонаи барқи Қазоқистон сурат мегирад.
Ҳаҷми тахминии интиқоли нерӯи барқи пешбинишуда, ки дар шартнома нишон дода мешавад, барои ба вуҷуд омадани ӯҳдадориҳои молиявӣ ё дигар ӯҳдадориҳои байни фурӯшанда ва харидор асос намегардад.
Транзити нерӯи барқ ба марзи Қазоқистон аз ҷониби ҶСК "НБО Роғун" амалӣ карда мешавад.
Арзиши нерӯи барқи ба нақша гирифташуда аз ҶСК "НБО Роғун" ба андозаи 3,4 сент барои 1 киловатт-соат (бо назардошти андоз аз арзиши иловашуда, бо фоизи сифр пардохта мешавад) ҳаҷм тибқи ҷадвалҳои тасдиқшудаи интиқоли ҳаррӯза муайян карда мешавад.
Арзиши транзит дар асоси харочоти фурушанда хангоми транзити неруи барк дар мкишварҳои хамсояи Осиёи Марказӣ то сархади Казокистон муайян карда мешавад (бо шарти тасдиқи хароҷоти фурӯшанда).
Ёдовар мешавем, ки лоиҳаи нерӯгоҳи Роғун дар замони Шӯравӣ таҳия ва корҳои сохтмонӣ ҳамон вақт оғоз ёфта буд. Аммо ба далели ҷанги шаҳрвандӣ, надоштани пул ва ҳам мухолифати кишварҳои поёноби Осиёи Марказӣ ҳукумати Тоҷикистон натавонист, онро такмил кунад ва танҳо соли 2016 ба сохтмони асосии он шурӯъ намуд.
Нерӯгоҳи Роғун 6 чарха хоҳад дошт ва дар сурати пурра ба кор даромаданаш солона то 17 миллиард киловатт-соат барқ тавлид хоҳад кард, ки ба қавли мақомот, на танҳо барои истифода дар дохили кишвар, балки барои содир кардан ба Афғонистону Покистон ҳам кофӣ хоҳад буд.