ДУШАНБЕ, 15 ноя — Sputnik. Варзишгарони Тоҷикистон дар чемпионати Осиёи Марказӣ оид ба варзиши сабук, ки дар шаҳри Урумчии Чин баргузор шуд, нерӯсанҷӣ намуданд.
Ба ин мусобиқа аз Тоҷикистон 15 варзишгар роҳ ёфта, дар маҷмӯъ онҳо соҳиби 4 медал – 2 тило ва 2 нуқра гардиданд, хабар медиҳад Кумитаи ҷавонон ва варзиш.
Медалҳои тилоро Кристина Пронженко дар давидан ба масофаи 60 метр бо натиҷаи 8,35 сония ва Леонид Пронженко дар давидан ба масофаи 60 метр бо монеа бо натиҷаи 8,16 сония ба даст оварданд.
Медали нуқраро Илдар Ахмадиев дар ҷаҳидан ба дарозӣ бо натиҷаи 7,11 м азхуд кард.
Илова бар ин, дар эстафета ба масофаи 4х400 м дастаи Тоҷикистон (Леонид Проженко, Муҳаммадҷон Самирзода, Кристина Проженко, Жасмин Розиқова) низ бо натиҷаи 3:46,12 дақиқа соҳиби медали нуқра гардид.
Дар ин мусобиқа 243 варзишгар аз Тоҷикистон, Қазоқистон, Қирғизистон, Узбакистон ва Чин ширкат доштанд.
Ёдовар мешавем, ки рӯзи 11 ноябр дар Урумчӣ мусобиқаи варзиши сабук миёни кишварҳои Осиёи Марказӣ дар гурӯҳҳои синнашон то 16, 18, то 20 ва варзишгарони калонсолон оғоз шуд.