ДУШАНБЕ, 14 окт — Sputnik. Бонки миллии Тоҷикистон арзиши сомониро дар баробари арзҳои мухталифи хориҷӣ эълом кард.
Ҳамин тариқ қурби рубли русӣ дар баробари пули миллӣ пас аз муддати башиддат коҳишёбӣ ҳафтаро бо каме болоравӣ оғоз кардааст.
Тибқи нишондоди БМТ, ҳоло дар ҷумҳурӣ 1000 рубл 110,7 сомонӣ аст.
Ин нишондиҳанда дар қиболи додаҳои охири ҳафтаи қаблӣ 1,7 сомонӣ бештар аст.
Нархи пули амрикоӣ ҳам, ҳафтаро бо гаронӣ оғоз кард. Агар ду рӯз қабл як доллари ИМА ба 10.6500 сомонӣ баробар буд, ҳоло 10,6624 сомонӣ қимат дорад.
Қурби пули аврупоӣ низ боло рафта ҳар евро 11,6572 сомонӣ қимат доред. Ин дар ҳолест, ки ҷумъаи гузашта бар ивази ҳар евро 11,6426 сомонӣ медоданд.
Рубл дар Тоҷикистон яке аз сертаваҷҷуҳтарин асъор ба шумор меравад ва қимати он ба пул дар кисаи аҳолии кишвар таъсири бевосита дорад.
Аз ҷумла садҳо ҳазор тоҷикистонӣ дар Русия кор мекунанд ва муздашонро бо рубл мегиранду мефиристанд, аммо хонаводаҳояшон вобаста ба қурб онро бо сомонӣ мегиранд.
Бонки миллии Тоҷикистон ҳушдор медиҳад, ки риоя накардани қоидаҳои муомилоти асъорӣ боиси ҷавобгарии маъмурӣ ва ҷиноӣ мегардад.
Ба амал баровардани муомилоти мубодилавӣ берун аз ҳудуди бонк, филиал, марказҳои хизматрасонии бонкӣ, нуқтаҳои интиқоли пул, банкоматҳо ва терминалҳо қатъиян манъ аст.
Таъкид шудааст, ки риоя накардани талаботи мазкур аз ҷониби шахсони воқеӣ қонуншиканӣ ба ҳисоб рафта, сабаби ба ҷавобгарии маъмурӣ ва ҷиноятӣ кашидан мегардад.