ДУШАНБЕ, 4 окт — Sputnik. Бунёди дастгирии улуми гуманитарии “Таърихи ман” ба мактабҳои Тоҷикистон аз номи Вазорати маорифи Русия ҳудуди 300 ҳазор китоби дарсии забони русӣ тақдим кард, иттилоъ додааст дафтари матбуоти ин бунёд ба РИА “Новости”.
Ахиран дар шҳари Душанбе бунёди мазкур аз номи Вазорати маорифи Русия ба Вазорати маорифи Тоҷикистон тақрибан 300 ҳазор китобро аз ҷумла китоби дарсии забони русӣ ва забони русӣ ҳамчун забони хориҷӣ барои синфҳои 1-11, ки як қисми он дар Тоҷикистон чоп шудааст, ба таври ройгон тақдим намуд.
Ин маъракаи якдафъаина нест ва дар оянда барномаи супоридани китобҳои дарсии забони русӣ ба Тоҷикистон тавсеа хоҳад ёфт, қайд карданд намояндагони ин бунёд.
Тавре дар паёме, ки қаблан аз ҷониби хадамоти матбуоти ин бунёд нашр шуда буд, гуфта мешуд, ки бо дастгирии Вазорати маорифи Русия Бунёди "Таърихи ман" корҳои таҳия ва мутобиқсозии китобҳои дарсии забони русӣ барои мактабҳои Тоҷикистонро роҳбарӣ кардааст.
Қайд карда шудааст, ки адабиёти таълимӣ ва методӣ бо назардошти хусусиятҳои иҷтимоӣ-фарҳангӣ ва ҷуғрофии кишвар ва ҷузъи миллӣ мутобиқ карда шудааст.
Дар таҳия ва мутобиқсозии китобҳои дарсӣ аз ҳарду ҷониб коршиносони соҳаи маориф ҷалб карда шуданд.
Дар натиҷа, дар моҳи июли соли равон китобҳо дар Вазорати маориф ва илми Тоҷикистон аз санҷиши ниҳоӣ гузаштанд.