ДУШАНБЕ, 3 окт — Sputnik. Ахиран дар Душанбе мулоқоти муовини вазири тандурустӣ ва ҳифзи иҷтимоии аҳолии Тоҷикистон Шодихон Ҷамшед бо намояндагони ширкати ”Моторика”- и шаҳри Маскави Русия сурат гирифт.
Дар ин бора дафтари матбуоти вазорати тандурустии кишвар хабар додааст.
Ба иттилои манбаъ, намояндагони ширкати ”Моторика” оид ба тайёр намудани маводҳои ортопедию протезӣ, таъминоти маъюбон бо намунаҳои нави технологӣ, аз ҷумла протезҳои дастҳои намуди бионикӣ ва дар ин самт ба роҳ мондани ҳамкориҳо бо вазорат андашаҳои худро иброз доштанд.
Дар идомаи мулоқот тарафҳо дар бораи омода намудани мутахассисон дар самти тавонбахшӣ табодули назар карданд.
Инчунин тарафҳо, ҳамкориҳо дар самти тайёр намудани маводҳои ортопедию протезӣ барои маъюбон ва дигар масъалаҳо мубодилаи афкор намуданд.
Ҷонибҳо ҳавасмандии худро барои боз ҳам тақвият бахшидани ҳамкориҳо иброз намуданд.
Ёдрас мешавем, ки санаи 1-уми октябри соли ҷорӣ дар Корхонаи давлатии “Заводи протезию ортопедӣ”-и шаҳри Душанбе бо иштироки намояндагони ширкати мазкур нахустин бор дар кишвар дар ду кӯдаки то синни 10 сола дастҳои намунаи нави бионикӣ гузошта шуд.