ДУШАНБЕ, 3 авг — Sputnik. КВД "Роҳи оҳани Тоҷикистон" барои зиёд кардани ҳаҷми содироти молу маҳсулот ва дастгирии соҳибкорони ватанӣ то 80 фоиз имтиёзҳо пешниҳод намудааст.
Дар ин бора дафтари матбуоти вазорати нақлиёти Тоҷикистон хабар додааст.
Ба иттилои манбаъ, масъалаи имтиёзҳо дар ҷаласаи васеи ҳайати мушовараи Вазорати нақлиётӣ баррасӣ шудааст.
Вазорати нақлиёт қайд кардааст, ки ҳамчунин ҳамкории судманд бо маъмурияти роҳи оҳани давлатҳои ИДМ ба роҳ монда шуда, барои интиқоли бор аз Узбекистон, Туркманистон, Қазоқистон, Русия ва дигар кишварҳо имтиёзҳои назаррас ба даст оварда шуданд.
“Дар қатораи мусофирбари "Душанбе-Кӯлоб" 60% тахфиф ва тибқи мувофиқа бо роҳи оҳани кишварҳо (Русия, Қазоқистон ва Узбекистон) ба мусофироне, ки чиптаҳоро пешакӣ мехаранд, то 45% сабукӣ пешбинӣ шудааст”, -қайд кардаст вазорат.
Ҳамчунин зикр карда шуд, ки ҳиссаи нақлиёти роҳи оҳан дар интиқоли байналмилалии борҳо назаррас аст.
Тибқи иттилои вазорати нақлиёти кишвар ба ин намуди нақлиёт 72,2% боркашонии байналмилалӣ рост меояд.