ДУШАНБЕ, 31июл — Sputnik. Сомон Маҳмадбеков барандаи медали биринҷии Бозиҳои олимпӣ шуд.
Сомон Маҳмадбеков, барандаи медали биринҷии қаҳрамонии ҷаҳон, ки дар мусобиқаи ҷудо дар вазни то 81 кило дар даври аввал озод буд, дар даври дувум Фарес Бадавии фаластиниро шикаст дод.
Ҷудокори тоҷик дар даври севум бар Франк Де Вит аз Ҳолланд пирӯз шуда, ба даври чорякниҳоӣ роҳ ёфт. Дар чорякфинал Сомон Маҳмадбеков аз қаҳрамони секаратаи ҷаҳон Тато Григалашвилии гурҷӣ мағлуб шуд.
Аммо Сомон муборизаро дар даври тасаллобахш идома дода, бар паҳлавони узбек Шарофиддин Болтабоев ғолиб омад.
Паҳлавони тоҷик дар рақобати ҳалкунанда барои медали биринҷӣ бар Антонио Эспозитои итолиёӣ пирӯз шуд.
Дар ҳоли ҳозир дастаи мунтахаби Тоҷикистон як медали биринҷӣ дорад.
Ёдовар мешавем, ки дар Бозиҳои тобистонаи олимпӣ дар Порис аз 14 варзишгари тоҷик иштирок дорадю дар ҳоли ҳозир чаҳор нафарашон рақобатҳои худро ба анҷом расониданд.
Бояд қайд кард, ки дар 16 соли охир ин медали аввалини ҷудокорони тоҷик дар Бозиҳои олимпист. Бори охир дар Олимпаиадаи Пекин-2008 Расул Боқиев дар риштаи ҷудо дар вазни то 73 кило соҳиби медали биринҷӣ шуда буд.